SEBUYAU: Projek Jematan Batang Lupar 1 ti deka nyadi jematan pemadu panjai ba Malaysia diatu udah manggai 84 peratus lalu disadang ulih ditengah maya ngintu Gawai Dayak 2026.
Sapit Premier Sarawak, Datuk Amar Douglas Uggah Embas madah, jematan ti 4.8 kilometer pemanjai enggau tiang 111 meter peninggi nya deka nyadi kelai menua baru Sarawak.
Ku iya, projek besai nya mega deka ngemandakka jam pejalai ba kandang menua pesisir.
“Kami udah diberi penerang senentang pejalai projek tu ti belabuh 7 Januari 2021 lalu ari semua pengawa, kami tepantup ati taja bisi sekeda penanggul ditapi.
“Siti ari penanggul ti dikelala iya nya tiang lumur 52. Taja pia, penanggul tu deka ulih diputar raban kunteriktor,” terang iya.
Uggah nerang pekara nya ngagai pemberita pengudah ngabas taba Projek Jematan Batang Lupar 1 nya, ditu tadi.
Projek jematan beungkus RM848.7 juta nya disadang tembu 28 Februari 2026, lalu nyadi jalai penyambung besai kandang tebing tasik Sebuyau enggau Triso ba Bagi Menua Samarahan enggau Betong.
Jematan ti digaga ngena Standard Opis Kereja Raya (JKR) R5 nya deka nyilih servis feri Batang Lupar ti sebedau tu nyadi jalai penyambung peranak dia.
Menteri Infrastruktur enggau Pemansang Penyangkai Kapal Sarawak nya mega meri terima kasih ngagai raban kunteriktor ti naka ulih mutar penanggul taba projek ti ba nanga sungai semak tasik.
“Tu endur ti enda ulih disagam nama utai ulih nyadi, tang ari penemu anda sida, penanggul ulih diputar manah.
“Kami ngarap ke semua kunteriktor ngamatka tanggungpengawa sida nembuka projek nitih taga ditetap,” ku iya nyemetak.
