SIMANGGANG: Jematan Batang Lupar Dua deka nyadi jematan kabel pemadu tinggi di Malaysia pengudah tembu ila.

Direktor Kereja Raya Sarawak, Dr Ir. Cassidy Morris madah, ukai semina nya aja, endur ti strategik deka nyambung Sri Aman enggau Pasar Betong meraka Batang Lupar.

“Tu deka nyadi kelai menua baru Sarawak enggau Malaysia mega.

“Ari peninggi 145.5 meter ti sama ninggi 45 ringkat enggau pemesai 870 meter, jematan tu deka nyadi jematan kabel pemadu tinggi di Malaysia.

“Pemadu beguna, jematan tu deka nyadi jalai penyambung entara Jalai Tebing Tasik enggau Jalai Besai Pan Borneo,” ku iya nengah Facebook rasmi, tadi.

Cassidy madah, jematan tembu suku keterubah taun baru nya deka ngerumban enggau ngelantang pejalai rayat sereta negapka rentayan pengangkut di zon tengah Sarawak.

“Aku lebuh pejalai gawa ditu kena Hari Dua tu tadi, dipadah rentayan jalai sepanjai 21 kilometer ti mega ngaul 3.2 kilometer jalai ke pasar Sri Aman enggau 3.8 kilometer jalai ke pasar Betong nya sebagi ari Jalai Besai Kedua.

“Lebuh tembu ila, takah pejalai entara Sri Aman enggau Betong disadang kurang ari 71 kilometer ngagai semina 28 kilometer.

“Seraya jam pejalai ulih dikurang ari sejam ngagai semina setengah jam aja,” ku iya.

Cassidy madah ke Opis Kereja Raya (JKR) naka ulih nentuka projek dipejalai enggau sikar sereta likun, ungkup pengelantang timpuh panjai rayat enggau pemansang Sarawak. – OSMAN RAZALI