KUCHING: Jematan Sejingkat nyadi projek jematan besai ke-12 ti udah tembu digaga lalu diatu belabuh ulih ditengah mensia mayuh kemari seraya nyendia jalai altenatif ti deka ngemandak taga pejalai entara Samarahan enggau Kuching.
Sapit Premier Sarawak, Datuk Amar Douglas Uggah Embas madah, jematan ti ulih ditengah nya siti da turai sejarah ba pemansang infrastruktur nengeri, kelebih agi pengudah mujur tembu tumu agi ari taga asal.
Ku iya, jematan sepanjai 1.281 kilometer nya mega disikap urung 200 meter jalai penyambung sereta bisi dua tiang enggau penyelai betukuh intan ke nyadi struktur keterubah di Malaysia.
“Sebedau tu, kami merambu jematan tu ulih ditengah ujung bulan Oktober, tang kunteriktor mujur nembuka nya tumu agi lalu ulih ditengah mensia mayuh belabuh kemari.
“Pengudah pengawa tu, mensia mayuh udah ulih nengah jematan tu ngelayang Sungai Sarawak,” ku iya lebuh dirandau pemberita serimbai mantar bejadi Jematan Sejingkat, ditu kemari.
Uggah madahka penumbuh jematan nya deka meri ubah nyengala ngagai mobiliti peranak laban pejalai ari Kota Samarahan ke Sejingkat nadai agi begunaka penguna bepanggai ba jalai ke bisi diatu nengah SamarahanKuching Expressway.
Ku iya baru, perengkaguna nya mega akses jalai ke muntang agi ngagai Padang Bilun Antarabansa Kuching, Petra Jaya enggau palan industri ngelingi Demak.
“Tu chukup besai reti laban nya ngemuntang pejalai mensia mayuh mindah sereta nambah aksesibiliti kededua endur ngagai mensia mayuh. “Nya kebuah aku meda jematan tu nyadi game changer ngagai peranak ditu,” ku iya.
Uggah mega madahka pemaik besai agi ulih diasai pengudah Pakej DC3 ti nyambung endur nya enggau Kota Samarahan tembu ila, ti disadang ujung taun baru.
Ngenang silik, ku Uggah, Jematan Sejingkat nya sebagi ari projek Jalai Besai Kedua Sarawak ti diperambu dikena nempa rentayan komunikasyen ti efisyen agi nyentuk Sebuyau enggau Sri Aman, lalu nyaup ngemandak taga pejalai ngagai adap tengah nengeri.
Tandu iya, Jematan Sejingkat iya nya jematan besai ke-12 ti tembu digaga ari 21 jematan besai ti diperambu di Sarawak.
“Empat da ditaga tembu ba timpuh dua nyentuk tiga bulan, lalu ke bukai deka tembu taun baru,” ku iya.
Iya mega meri besai terima kasih ngagai Opis Kereja Raya (JKR), kunteriktor enggau konsultan ke udah meri kerejasama nentuka isu sekumbang bejalaika projek ulih diputar nyentuk jematan nya ulih ditengah tumu agi.
Berebak enggau nya, Uggah nerangka pengawa ngaga rentayan jematan enggau jalai nya ukai semina dikena nambah jalai penyambung, tang mega ngerandang endur baru ungkup aktiviti ekonomi enggau meri peluang ngagai peranak ngubah tikas pengidup sida.
“Nengah pemisi pemansang infrastruktur tu, endur ti bisi pemansut ekonomi deka nambah lalu rayat deka bulih peluang nambah sereta ngubah pengidup sida,” terang iya.
