TATAU: Program UKAS Begulai enggau Komuniti (Ngiling Bidai) 2026 nyadi pelasar ngenegap pemanah kaul perintah enggau rayat nengah pengawa nyadung penerang bekaul polisi enggau inisiatif pemansang Sarawak.
Menteri ba Opis Premier Sarawak ke mega Kaban Kunsil Nengeri (ADUN) Kakus, Datuk Sri John Sikie Tayai madah, program ke diatur Unit Komunikasi Awam Sarawak (UKAS) nya bela meri awak ngagai rayat mayuh betemu enggau pemesai enggau pengari agensi perintah.
“Tuju program tu dikena kitai nyungkakka agi tikas pemanah kaul perintah enggau rayat seraya ngenataika penerang bekaul polisi enggau inisiatif Perintah Sarawak.
“Awak tu bela dikena kitai meruan nyaga enggau ngintu pesaka adat sereta main asal ungkup rebak dudi,” ku iya.
Sikie bejaku munyi nya maya Program UKAS Begulai enggau Komuniti (Ngiling Bidai) 2026 ba Rumah Dali Bundan, Pasir Nangka, Tatau, empa lama.
Berebak enggau nya, iya ngelalau bala tuai rumah, tuai raban bansa enggau raban Kaunsil Tuai Raban Bansa enggau Genturung Pendiau (KMKK) ngambi semampai nyadi jematan perintah enggau rayat ba pengawa ngenataika isu ngambika ulih diputar enggau patut.
Maya nya mega, Residen Sitak Bintulu, Datu Nyurak Keti madah, kerejasama manah apai indai, tuai rumah, tuai raban bansa enggau polis beguna dikena mutar penusah salah guna dadah ti majak ngirauka ati.
Ku iya, dadah ke mayuh dirampas berega bejuta ringgit ba padang bilun enggau penyangkai kapal mandangka penusah nya majak balat nyadi sereta patut diputar enggau engkeman dikena nyaga bala nembiak lebih agi di menua pesisir.
“Dadah tu datai ari ni? Anak kitai ba menua pesisir baik nya anak Iban, Penan, Kayan tauka bansa bukai meseti dijaga kitai,” ku iya.
Bela datai ba pengerami nya Pegawai Pelilih Tatau Calvin Ligong Bujang @ Endawie sereta bala bukai. -EDISI UKAS
