Jesse enggau Nicholas nyadi Kumang, Keling Gawai SDNU Siol Kandis 2019

KUCHING: Jesse Diana Jantai, 21 taun enggau Nicholas Stindin Tikok, 26 taun mujur nyadi champion Pekit Kumang enggau Keling Gawai Dayak Siol Kandis 2019 mai pulai perais mata duit RM1,000, selampai, setipikit enggau trofi.

Jesse Diana dara bajik ari Simunjan udah mujur ngalah ke semilan iku dara bajik bukai lalu Nicholas Stindin Tikok bujang sigat ari Lubok Antu udah mujur ngalahka lapan iku bujang sigat bukai ti sama enggau pekit nya.

Nangkan ke nya, penuduk lumur dua tauka gelar Lulong enggau Laja pulai ngagai Jasmine Sha Sha Salleh, 22 taun ti beasal ari Siol Kandis enggau John Watson Tamin Willie, 28 taun ti beasal ari Layar Betong mai pulai perais mata duit RM800, selampai, setipikit enggau trofi.

Lalu tempat ketiga tauka gelar Selingar Matahari enggau Bungai Nuing pulai ngagai Chela Nuri Michael, 24 taun ti beasal ari Sri Aman enggau Wilson Joseph, 24 taun ti beasal ari Bau mai pulai perais mata duit RM500, selampai, setipikit enggau trofi.

Kesemua perais pekit disuaka temuai ti dipebasa Menteri Muda Undang-undang, Kaul Sarawak enggau Perintah Besai sereta Matau Projek Sharifah Hasidah Sayeed Aman Ghazali ti mega menyadi ka Pengerami Gawai Dayak Siol Kandis 2019 kena 11 Mei tu tadi.

GAMBAR KENANG… Menteri Muda Undang-undang, Kaul Sarawak enggau Perintah Besai sereta Matau Projek Sharifah Hasidah Sayeed Aman Ghazali (dua kanan) begambar kenang enggau enam iku sida ti udah mujur bulih lumur ba pekit Kumang enggau Keling Gawai Dayak Siol Kandis 2019.

Lebuh ke dirandau Suara Sarawak sida enam madah kediri cukup temegah udah bulih lumur ba pekit tu.

Pia mega sida madah ka chukup gaga ulih mantai ka ngepan lelaki enggau indu asal bansa Iban ngagai mensia mayuh ti pupu bansa ngulu pengerami nya.

“Enda nyangka bulih lumur laban endang mayuh pemar lebuh deka enggau pekit tu lalu ditambah mayuh mega dara bajik ke bukai tang pengerindu mantai ke pekayan asal indu Iban ngasuh kami semua sama bela ransing bepekit baka ke malam tu,” ku Jesse enggau Jasmine ke bejuluk Kumang enggau Lulung Siol Kandis 2019.

“Berasai temegah ulih bulih lumur ba pekit tu laban suah kitai ninga pekit Kumang aja ti dipantaika orang lalu ba pekit tu bisi pekit Keling nya alai mensia mayuh ulih meda dua bengkah pekayan ti dikena indu enggau lelaki asal bansa Iban ti patut dikemerat ke kitai semua kelebih agi nembiak rebak baru bansa Iban,” ku Nicholas enggau John Watson ya ke mega bejuluk nama Keling enggau Laja malam nya.

Nangkan ke nya, Wilson enggau Chela ti bejuluk Bungai Nuing enggau Selingar Matahari meri pengaga ati ngagai apai indai, kaban belayan enggau pangan ti mayuh mantu ngelekat ke pekayan ti dikena malam nya ngambika tampak bajik enggau sigat.

KELING ENGGAU KUMANG….Champion Kumang enggau Keling Gawai Dayak Siol Kandis 2019 ngambi awak begambar pengudah tembu pengawa bepekit malam nya.

“Kena nyikap diri enggau pekit tu aku mayuh ngiga info ba internet, facebook enggau betanya ba orang bukai ke kala enggau pekit dara bajik ngulih ke penau enggau penemu ari sida,” ku Chela.

Ngena rambai jaku ‘Begempung Nuju Pemansang’ pengerami tu diatur Komiti Pemansang enggau Pengelikun Genturung Pendiau (JKKK) Siol Kandis begulai enggau Sarakup Bansa Dayak Sarawak (SDNU) pampang Siol ba ditu.

Kelimpah pekit Kumang enggau Keling bisi mega diatur pekit nyumpit diatur kilah pagi ba hari ti sama, pengawa bedagang barang pemakai sereta utai bukai ngagai mensia mayuh ke bisi datai.

Sama bisi datai ngulu pengerami nya bala komiti JKKK Siol Kandis, bala SDNU pampang Siol enggau peranak ba genturung pendiau menua nya.

BELA BAJIK….Tiga dara bajik Kumang (tengah) ti diapit Lulong (kanan) enggau Selingar Matahari (kiba) ngambi gambar kenang begulai.

Suara Sarawak