KUCHING: Opis Imigresyen Malaysia (JIM) Sarawak deka bejalaika operasyen besai neritka atur ngagai peranak menua luar ti gawa ba nengeri tu pengudah timpuh ngerejister Program Rekalibrasyen Pengereja Pengawa (RTK) 2.0 kena 31 Disember tu.
Sapit Menteri ba Opis Premier Sarawak (Pengereja Pengawa, Imigresyen enggau Patau Projek), Datuk Gerawat Gala nengah penerang BERNAMA ngelalau pengereja pengawa ari menua luar ti nadai permit gawa enggau pengaji ngena peluang ngerejister ba program nya.
Iya madah, kita patut ngerejister diri betunga mua enggau raban JIM sereta Opis Pengereja Pengawa Nengeri.
“Ungkup atur ngerejister ba baruh Program RTK 2.0 tu, pengaji patut mantai peminta nengah tali arus ba website JIM www.imi.gov.my lalu terus nekan link Portal Rekalibrasyen.
“Nadai sebarang bayar diletak ngagai pengaji sepanjai timpuh ngerejister nya.
“Pengaji ti ngupah pengereja pengawa menua luar ti nadai permit deka diukum ba baruh Seksyen 55B(1) Akta Imigresen 1959/63.
“Nya mungkur ukum mata duit enda kurang ari RM10,000 enggau enda lebih ari RM50,000 tauka dijil enda lebih ari 12 bulan tauka kededua sekali ungkup siku pengereja pengawa ti diambi gawa,” ku iya ba sebengkah penerang sehari tu.
Gerawat madah, sida ti dikemendar ngerejister ba Program RTK 2.0 nya baka pengereja pengawa menua luar ti ngereja penyalah ba tauka sebedau 31 Disember 2022 ba baruh Seksyen 6(1)(c) enggau Seksyen 15(1)(c) Akta Imigresen 1959/63 sereta Peraturan 39(b) Peraturan-Peraturan Imigresen 196.
