KAPIT: Sapit Menteri ba Opis Premier Sarawak (Undang-Undang enggau Adat Bumiputera) ke mega Kaban Kunsil Nengeri (ADUN) Bukit Goram, Datuk Jefferson Jamit Unyat meri agih belanja ngagai sekeda komuniti rumah panjai lebuh Program Randau Komuniti UKAS 2026 ke diatur di Rumah William Unchat, Sungai Yong, Hari Lima tu tadi.
Ba program nya, iya ngemendar agih belanja sepenyampau RM15,000 ngagai Komiti Pemansang enggau Pengelikun Genturung Pendiau (JKKK) sereta Gerempung Indu Rumah William Unchat, kelimpah RM5,000 ngagai tetiap rumah panjai ke bisi datai.
Lebuh bejaku, iya nyemetak madah ke pemesai guna penyerakup enggau kerejasama rayat nyadi pun pemansang ke dipejalai belama enggau inklusif, kelebih agi ba menua pesisir.
Seraya Sapit Residen Bagi Menua Kapit, Robert Liman Deli madah ke Randau Komuniti UKAS ari baruh inisiatif Sarawakku Sayang (SKS) nya nyadi pelasar beguna ti mai servis perintah semak ngagai rayat.
Ku iya, program nya ngasuh mayuh ejensi perintah ulih gawa ngenatai penerang, polisi enggau servis terus ngagai rayat menua nya. – EDISI UKAS
