KUCHING: Opis Pengintu Pengelantang Pendiau Mensia Mayuh (JKM) udah nyikap diri napi gaya ampuh bah ti nyadi di selampur menua diatu.
Menteri Pemansang Indu, Ruang Bilik enggau Komuniti Datuk Seri Nancy Shukri madah, naka diatu Palan Ngenduh (PPS) chukup kelimpah bekal pemakai enggau kereban bukai udah sedia dikena nyamin pengelikun enggau pengelantang komuniti ti kena ampuh bah.
“Opis menteri seruran bejaga sereta sedia nimbal sebarang pekara ti nyadi ketegal gaya hari ti enda manah.
“Naka pukul 4.30 lemai tadi (Hari Minggu), bisi lapan PPS dibuka di lima buah nengeri.
“Nya ngaul 93 ruang bilik enggau 219 iku ti pindah ungkup pengelikun,” ku iya.
Nancy bejaku munyi nya ngagai pemberita pengudah bejadi Program Ceria Kasih YKN enggau Bantu Back To School 2026 ba Hikmah Exchange ditu, ensanus.
Ku iya, JKM udah besikap tumu sereta komprehensif nyengkaum muka PPS, bejalaika pengawa rejister orang ti pindah nengah sistem MyIBJKM sereta ngagihka barang ti diguna.
“Bekal ba semua PPS diripotka chukup dikena nangkup guna sida ti deka pindah kia.
“Pengawa nyikap diri ukai penanggul diatu lalu semua udah sedia.
“Semua pemesai mega udah diasuh seruran sedia dianjung gawa,” ku iya.
Nancy mega madah ke opis menteri iya deka terus matau pekara nya enggau silik nyengkaum jaku tangkan gaya hari pemadu baru ari Opis Meteorologi Malaysia (MetMalaysia).
