KUCHING: Manah agi enti Sarawak enda nurutka surat gerah Opis Menteri Pelajar Malaysia (KPM) muka sekula kena 20 Januari tu.
Menteri Kaunsil Kandang Menua enggau Pengawa Berumah Datuk Seri Dr Sim Kui Hian madah, taja pekara pelajar dikuasa Perintah Besai, tang Sibu diatu benung bejalaika Atur Mindah Betagang (PKP).
Ku iya, pia mega di Kuching enggau Miri neritka Atur Mindah Betagang Belebas (PKPB) dikena nagang pengerekai Covid-19.
“Nya alai Komiti Penyangga Penusah Nengeri Sarawak (JPBNS) deka ngaga pemutus pasal pekara tu.
“Semua pekara deka diberi perati bepelasarka zon enggau utai ke nyadi dia, ditambahka penusah bah benung nyadi di Kuching.
“Kelimpah ari nya, bala pengajar ari Semenanjung Malaysia enggau Sabah ke mulaika diri gawa ke Sarawak mesti kuarantin 14 hari,” ku iya madah nyemetak.
Kui Hian mansutka jaku nya lebuh nyaut tanya mensia mayuh pasal surat gerah KPM ti muka sekula kena 20 Januari ba nengeri PKPP nyengkaum Sarawak.