LUBOK ANTU: Kaban Parlimen Lubok Antu, Jugah Muyang besemaya mutarka penusah tanah tusur ba jalai ngelawa Sekolah Kebangsaan (SK) Nanga Menjuau ditu.
Nitihka penerang ari laman Facebook SK Nanga Menjuau, Pegawai Khas Jugah Muyang udah berandauka pekara nya enggau Kepala Pengajar pengudah nerima berita penusah ke nuntung sekula nya.
Asil ari randau nya madahka Jugah udah besetuju nganjung bantu dikena ngaji kunteriktor nyungkur tanah ke tusur ba jalai nya.
Sebedau tu, ba laman facebook ke sebaka mantaika penusah tanah tusur nyadi ba jalai ngelawa sekula nya.
Kelimpah dikena ngelawa sekula nya, jalai tu mega ditengah peranak rumah panjai ke besemak.
Penanggul nyadi ketegal sida ti bekunsika jalai nya nadai daya besaup meresi tauka muai tanah ke tusur laban nadai kereban dikena.
Mese ga utai ulih dikereja enti semina ngena tulang, ukai tanah ulih dikatung lalu dibuai ke bukai sereta penanggul teputar tekala nya.
Nya alai sida dia andal amat raban ke bekaul ulih datai nyaup mutarka penusah sereta ngaduka jalai nya.
Sida dia nangi bendar laban udah lebih seminggu jalai nya tusur tang agi empai likun ditengah.
Pengirau tu lebih agi diasaika enti sema penusah enda disadang nyadi nuntung sida semenua.
Tambah mega semina jalai tu aja ditengah sida ketegal empai bisi jalai bukai tauka jalai ke meruan agi.