KUCHING: Siku kaban Opis Perengka Pengangkut Darat (JPJ) bebadi nyawa pengudah motosikal ditepan iya belantak enggau sebuah kerita ba Jalai Lundu-Bau dini hari tadi.

Niang benama Rekeo Andrew Achin, 40 taun, ari Kampung Senibong.

Kenu ku Ketuai Opis Pansik enggau Penerit Adat Trafik Sarawak Superintendan Alexson Naga Chabu, penusah diripot nyadi urung pukul 3 pagi lebuh deriba kerita nya, Tapah Akey, 52 taun, ari Kampung Suba Buan Baru benung ba rantau jalai pulai ari Kampung Stunggang Ulu, Lundu ke Bau.

Ku iya, gaya jalai lebuh nya agi petang enggau berambun, ke alai lebuh datai ba siti tiku, derita kerita meda motosikal ditepan niang datai ari Bau ngenyit tama ngagai jalai iya.

“Iya nguji nyeliah tang puntan lalu niang udah ngelantak mua kerita iya,” ku iya ba penerang kemari.

Alexson madahka niang balat bakal dituku parai tekala nya ba endur penusah nyadi seraya deriba kerita nadai bakal.

Kes dipansik di baruh Seksyen 41 (1) Akta Pengangkutan Jalan 1987.

Suara Sarawak