Kabong terus dikemansang nengah RTP

KABONG: Sitak Kabong terus nerima pemansang infrastruktur dibaruh Program Transformasyen Menua Pesisir (RTP).

Kaban Kaunsil Nengeri (Adun) Kabong, Mohd.Chee Kadir madah agih belanja penyampau RM5 juta tu mungkur semua sepenyampau 21 bengkah projek ungkup DUN Kabong udah dikemendar perintah Gempung Parti Sarawak (GPS) ungkup taun 2020.

“Pagi tu, kitai bisi meresa 13 iti taba projek ke mega semua pejalai iya ila deka dikemata piak JKR,”

“Kebendar semua sepenyampau 21 iti projek tu deka dikemata mayuh bengkah ejensi lalu siti ari ejensi ke diberi tanggungpengawa iya nya Opis Kereja Raya (JKR) Sarawak,”ku iya rambau bejalai iya meresa taba projek ungkup taun 2020 Sitak N.40 Kabong ba Empelam,Nyabor,Gerigat enggau rumah panjai besemak pagi tadi.

Nitih penerang, entara 13 iti projek RTP DUN Kabong dibaruh JKR iya nya Projek Ngaga Baru Jematan Masjid AS-Sabirin, Ngaga Baru Jematan Jalai Pendam Islam, Ngaga Baru Jelatung Semin Kampung Hulu Laut enggau Ngaga Baru Jalai Semin, Kampung Sungai Pala ari Rumah Tikun nyentuk ke Rumah Rahmat.

Pia mega ngaga baru Penyangkai Perau Mit Sungai Kampung Empelam, Jematan Rumah Ayum,Plassu Kabong enggau Jematan Sungai Peruntong Kampung Nyabor.

Nambah nya bisi mega projek bukai iya nya Projek Phase ll Jelatung Kampung Gerigat, Nyeleti Jalai Pendam Kristian Pagan, Empayang, Ngaga Baru Jematan Rumah Luang enggau Ngaga Baru Palan Penyangkai Perau Mit Rumah Bundan, Engkabang enggau Sungai Pangey,Gerigat ke beungkus RM 200,000 siti projek.

Sama datai Awangku Mohammad Safaie Awangku Sabli (Wakil Pemesai Pelilih Mit Kabong),Adrian Linggie Manjan,(JKR) Saratok, Penghulu Haji Sani Haji Mohamad, Penghulu Haji Batni Saidon, Penghulu Haji Kamaludin Ramli, Penghulu Michael Dajie enggau bala bukai.

Suara Sarawak