BARAM: Menteri Muda Perintah Menua Datu Dr Penguang Manggil udah datai niki Rumah Budin Nawek, Sungai Tuyut ditu kena Hari Enam tu tadi.
Iya ke dikangau datai nemuai maya nya dibai peranak rumah panjai berandau enggau sida.
Maya nya, peranak Rumah Budin madahka diri semampai bekerejasama sereta nyukung pemansang dibai perintah Gabungan Parti Sarawak (GPS).
“Kitai nerima manah penemu tu lebih agi ketegal mayuh rumah panjai jauh amat tinggal pemansang.
“Kitai begunaka kerejasama dikena nentuka pemansang infrastruktur mujur dipenyadi sereta dikena kitai negapka agi penatai pemisi rayat,” pia ku iya madah.
Kaban Kunsil Nengeri (Adun) Merudi tu mega madah, ba menua nya, perintah benung ngaduka pengawa nyambung karan nengah projek Bekal Karan Menua Pesisir (RS) Renggat I (Tuyut, Bukit Limau).
“Kelimpah ari nya, diatu mega benung ngaduka jalai tanah ti digagaka jalai batu.
“Aku diatu bela benung ngerintai nama menua tu ba program Bekal Ai Beresi Menua Pesisir ‘Tinjar Phase-3’,” ku iya nerang.
Berebak enggau nya, Dr Penguang madahka diri berasai temegah ati meda raban nembiak rumah panjai nya ti ngembuan pengeransing deka ngemansangka rumah sida.
Ba pengerami nya iya bisi nyuaka geran projek mit menua pesisir (MRP) sepenyampau RM32,000 ngagai Komiti Pengelikun enggau Pemansang Rumah Panjai (JKKK) Rumah Budin, JKKK Rumah John Mato (RM20,000), JKKK Rumah Agnes Ngerega (RM15,000) enggau JKKK Rh Galau (RM15,000).
Sama bela datai maya tu iya nya Sekretari Politik Kepala Menteri Alexander Asing, bala penghulu, kaunsilor sereta tuai rumah.
