Kami mantu nadai milih sapa, asal dipeda seranta terus dibantu

MIRI: ‘Asal aja orang nya dipeda seranta lalu begunaka bantu sigi diberi kami bantu nadai milih bansa enggau pengarap dipegai siku-siku,”ku Maxwell Ogos, 28 peranak asal Sarikei.

Munyi nya mih jaku dua iku orang ke gawa ‘Offshore’ mutus ati ngeluar belanja ari kuchik diri empu dikena mantu sebarang orang ke dipeda seranta ba Sarikei enggau Miri.

Maxwell madah,pengawa meri bantu tu bepun ari penyinu dalam ati diri kepuas meda gaya pengidup sekeda ari ruang bilik kurang bepemisi ketegal Atur Tagang Pejalai (PKP) diatu.

“Ukai deka nyalah ke perintah ti ngaga atur PKP diatu laban nya endang sigi patut dikereja dikena nagang pengerekai penyakit Covid-19.

“Kebendar pengawa kami duai bakih aku Milai Menggis, 49 bela asal ari Sarikei tu datai ngenyit kepuas meda pemar ditapi sida ti suntuk sekumbang PKP tu.

UNGKUP KITA..Maxwell Ogos (tengah) nyua bantu pemakai ngagai siti ruang bilik ba Tudan Desaras apin lama.

“Pia mega,pelin asal kami duai terubah iya semina deka bejalaika pemeri tu ungkup pelilih Miri aja.

“Tang laban timpuh PKP tu ti majak dilanjar perintah nya alai pengawa tu lalu nyerarai ke pelilih Sarikei,”ku iya maya dirandau pemberita, ensana.

Nambah nya ku Maxwel, naka sehari tu seduai udah mujur ngumpul turu RM5,000 asil pemeri mensia mayuh ti sama bisi penyiru mantu orang tusah ba pelilih Sarikei enggau Miri.

“Kebendar, bisi 29 iku bala bukai sama nyukung kami duai nengah chara meri belanja.

“Siti-siti ruang bilik ti kurang penatai pemisi deka nerima bantu barang pemakai baka berau, telu, minyak makai, ruti, kupi enggau ke bukai ti beungkus RM150

“Pengawa kami tu nadai tentu atur ti engkeman, kebuah pia laban dikereja ngelebus aja ba sebarang genturung pendiau, ku iya.

Berebak enggau nya, Maxwell ngarapka mayuh agi bala ti bepemisi gerah jari mantu orang ti seranta lebih agi nyerumba PKP tu.