KUCHING: Perintah nengah Kaunsil Pemansang enggau Nyaga Tanah (LCDA) deka bejalaika Projek Ngaga Pengentap Baru ungkup Kampung Baru Kapit.

Sapit Menteri Pemansang Mengeri enggau Pengeraja Asal Sarawak, Datuk Len Talif Salleh madah, sebuah taba 24.42 ikar pemesai udah dikelala ungkup Kaunsil Perambu Nengeri.

“Kaunsil Pemansang Pengawa Berumah (HDC) Sarawak merambu ngaga 73 unit Rumah Spektra Permata (RSP) khas ungkup peranak Kampung Baru ti endang udah bisi ti bekaul enggau pengawa ngaga pengentap baru genturung pendiau nya.

“Tang gaya tanah ba taba nya meri pemar ngujung ke penyampau lot rumah ti deka didirika dia betatak,” ku iya.

Len Talif mansutka jaku nya rambau nyaut tanya ADUN Pelagus, Wilson Nyabong Ijang bekaul taba ngaga rumah ulih diempu enggau projek betampung Kampung Baru ba Pasar Kapit ditu, sehari tu.

Ngelansa silik, ku iya, dikena numbuhka pengentap ti meruan, perintah merambu nyendia sekeda komponen ba sitak nya baka begunan kedai, stesyen minyak, palan puang enggau perengkaguna ti bukai.

Pia mega, nengah Langgur Pemansang Malaysia Lumpar Ke-12 (RMK-12), Opis Tanah enggau Survei deka bejalaika Skim Pengentap Baru (SPS) Selirik ti nyendia 91 lot rumah.