BINTULU: Peranak Kampung Jepak Hulu kelebih agi raban orang berikan deka bulih pemaik ari pengawa ngaga jelatung baru dikena nganti jelatung lama ti udah repuk.

Jelatung baru nya deka berengkah digaga ba pun bulan Oktober tu lalu disadang tembu ba timpuh tiga bulan.

Pegawai Palan Servis Kunsil Nengeri (DUN) Jepak, Shahrezy Sulaiman madah, projek beungkus RM100,000 nya ari agih belanja Program Transformasyen Menua Pesisir (RTP) DUN Jepak.

“Nengah pengawa nyeleti jelatung tu, kitai ngarap peranak ditu deka ngasaika fasiliti ti meruan agi,” ku iya.

Shahrezy mansutka jaku nya rambau ngarika ADUN Jepak, Iskandar Turkee pengudah matau gaya jelatung ba genturung pendiau nya ditu, kemari.

Tampung iya, projek nya dikemendar ba baruh Bajet RTP 2024 lalu pengawa milih kunteriktor dipejalai nengah pengawa chabut undi.