KUCHING: Bisi 34 kereban pengerara api diserah ngagai Kampung Selangan Batu dikena mantu peranak dia napi penyadi penusah angus.
Parlimen Bandar Kuching, Dr Kelvin Yii Lee Wuen madah, kereban pengerara api nya beguna dikena madam api tumu seraya nganti raban bomba datai.
“Pengawa madam api tu endang tanggungpengawa begulai komuniti ti diau ditu.
“Kami naka ulih nguji mantu rayat kelebih agi ba sukut pengelikun enggau pekara pemun ti diguna sida ngambi bela bulih pengidup ti manah,” ku iya.
Kelvin mansutka jaku nya rambau Program Nyuaka Kereban Pengerara Api ngagai komuniti Kampung Selangan Batu ditu, sehari tu.
Ku iya, rayat dipinta seruran berati enggau ngemerat pekara pengelikun maya bejalaika pengawa ba rumah.
Iya meri agih belanja RM100,000 ngagai Opis Bomba enggau Penyah Penusah (JBPM) Sarawak dikena ngatur program enggau meli keraban pengerara api ti diguna ba sitak Parlimen Bandar Kuching enggau Kunsil Nengeri (DUN) Pending.
Dulu ari nya, ADUN Pending, Violet Yong Wui Wui madah, 24 buah kereban pengerara api ti diberi ngagai peranak Kampung Selangan Batu nengah agih belanja iya lalu 10 buah ti bukai diberi JBPM Sarawak.
“Kena perengka tu enggau manah lalu lekatka ba palan ti muntang diambi laban enti bisi penusah angus nyadi, kita bisi kereban dikena ngerara api.
“Peranak ditu berumah rapit, nya alai, penyadi penusah angus balat ngirauka ati sida, aku andal kereban tu ulih meri pemaik ngagai sida,” ku iya.
