ISABELLA INCHANG
suarasarawak.sv@gmail.com
KAPIT: Kapit Waterfront tauka Tebing Ai Kapit renggat dua ti dipenyadi kemari nyadi ikon baru ngagai bagi menua nya.
Menteri Kereja Raya ti mega Kaban Parlimen Kapit, Datuk Seri Alexander Nanta Linggi madah, Tebing Ai Kapit ulih nyadi pematak pengusung enggau temuai luar datai ke Kapit.
Iya madah, projek beungkus RM10.3 juta nya mega sebagi ari inisiatif Perintah Sarawak ngemansang infrastruktur menua pesisir ti moden, inklusif enggau meruan agi.
“Tebing Ai Kapit deka nyadi palan mensia mayuh ti ukai semina ngemanah gaya rampa pasar Kapit aja tang mega nyadi palan aktiviti sosial, belepa enggau nyungkak ekonomi komuniti lokal.
“Lebih ari nya, ba aku Tebing Ai Kapit tu kebendar nyadi lambang kerejasama rat tauka kelai semangat segulai sejalai.
“Tu mega kelai pengelebih kitai gawa dalam siti tim ari semua raban nyengkaum pengari rayat, tuai renggat baruh, ejensi sereta opis perintah enggau peranak Kapit,” ku iya.
Nanta nibar ke jaku nya lebuh bejadi Perambu Projek Tebing Ai enggau Selapat sereta Nangkir Tebing Ai Kapit, ditu kemari.
