SIBU: Pengawa ngatur Karnival Main Asal Durin 2024 ti nyendia bemacham aktiviti narit ati ulih mantu ngelakuka Pasar Durin ngambi dikelala ba selampur dunya.
Chairman Kaunsil Pelilih Menua Pesisir Sibu (MDLBS), Kaunsilor Sempurai Petrus Ngelai madah, penatai beribu iku pengusung ari dalam enggau menua luar ti ngemataka bemacham aktiviti ba karnival nya deka ngeranchakka agi ekonomi enggau sektor dagang temuai peranak lokal dia.
“Pengawa ngatur karnival tu ungkup taun tu richah agi ari sebedau tu sereta mujur matak beribu iku pengusung ukai semina ari selampur Sarawak aja tang ari Semenanjung Malaysia, Indonesia, Brunei enggau Thailand,” ku iya.
Sempurai mansutka jaku nya rambau bejadi Program Nangguh Karnival Main Asal Durin ba Tebing Pasar Durin ditu, malam ensanus.
Iya madah, lumba regata mit diatur muak ke siang lalu Simponi Batang Rajang diatur muak ke malam ba hari keterubah karnival nya sereta mujur matak beribu iku pengusung.
“Karnival taun tu pemadu richah enti dibanding enggau taun-taun sebedau tu sereta nerima penatai pengusung pemadu mayuh ninting malam.
“Ba hari bejadika karnival tu kilah ensanus (27 April) urung 4,000 pengusung datai ngagai palan ngatur karnival tu ngemataka bemacham aktiviti narit ati ti bisi diatur dia,” ku iya.
Ku Sempurai, berebak ari penyulut nya, MDLBS mujur nyapai juluk sida ti deka nempa karnival nya nyadi pelasar dikena ngangkat enggau ngeranchakka agi ekonomi enggau sektor dagang temuai lokal.
Tampung iya, penatai bala pengusung ari dalam enggau luar Sarawak nyengkaum penyereta pekit lumba bot laju ari Thailand, Brunei, Indonesia enggau Semenanjung Malaysia ngasuh Pasar Durin majak dikelala.
“Karnival tu mega mujur ngempung komuniti pupu bansa enggau pengarap ngemataka bemacham aktiviti ti diatur enggau likun,” ku iya.
Karnival diatur tiga hari berunggu berengkah ari 26 nyentuk 28 April tu tadi endang program ninting taun MDLBS ti diatur ba Pasar Durin urung 43 kilometer penyauh ari mengeri nya.
