BINTULU: Apai indai meseti matau aktiviti online sereta media rama nembiak dikena nyeliah sida mudah tepejuh ngereja pengawa ke tau ngerusak runding enggau pemereti ati.
Pegawai Opis Pengintu Pengelantang Komuniti (JKM) Bagi Menua Bintulu, Sharifah Mordiah Syed Ali madah, penyiru apai indai matau ulah anak nengah media rama ulih nyeliah pengawa enda menuku dikereja anak sida.
Ku iya, inisiatif tu meseti bepun ari rumah lalu apai indai meseti matau aktiviti online anak sida ti agi nembiak ari kena panjuk pekara negatif.
“Tanggungpengawa nyeridi anak diatu chukup pedis laban apai indai meseti ngena chara ti semitan.
“Nengah pemansang teknologi kemaya hari, semua penerang sekali ke positif tauka negatif muntang amat ditemu,” terang iya.
Ba pekara nya, ku iya, apai indai beempu tanggungpengawa nyeridi anak sida ngena teknologi enggau pintar sereta meri pemaik lalu ukai salah guna teknologi kelebih agi telefon pintar, Internet, media rama enggau ke bukai ti tau ngerusak ulah sida.
