Kaul rat apai indai – pengajar ditempa ari pemereti ati

SRI AMAN: Pengerami Gawai Raya Sekula Primari (SK) Skarok mujur nempa kaul rat entara bala pengajar enggau apai indai.

Kepala Pengajar SK Skarok Kulok Laga madah, kelimpah ari ngintu pengerami begulai, sida mega ulih berandau betunga mua enggau apai indai seraya nerenakka pemereti ati.

“Piak sekula endang keran nempa pemanah kaul entara pengajar enggau apai indai laban kitai sedarka pemesai guna peneguh tanggam kaul tu.

“Tambah mega, bala pengajar ulih bekunsika penerang enggau pemansang pelajar bala anak sida seraya berandauka chara pemadu manah mutarka sebarang penanggul.

“Kitai mega ulih ngemai apai indai bela beratika pekara ti nyadi ba sekula sereta nerang silik agi pejalai pengawa dia,” ku iya madah nyemetak.

Kulok mansutka jaku tu lebuh bejaku ba Pengerami Gawai Raya SK Skarok di sebuah hotel tebilang ditu, apin lama ke udah.

Nangkan nya ku iya, piak sekula naka ulih ngatur pengawa gempuru nengah kerejasama apai indai enggau pengajar ngambika kaul ti ditanggam semampai rat sereta meruan.

Pengerami udah digulu bala pengajar enggau apai indai ngerasuk pekayan asal bansa sida empu.

Entara rintai aktiviti bisi diatur nyerumba pengerami malam nya baka pengawa nyirap kek, chabut tikit benasip enggau belagu.

NANGGAM KAUL… Kulok Laga (tujuh kanan) nyirap kek disempulang bala pengajar nyerumba Pengerami Gawai Raya SK Skarok di sebuah hotel tebilang ditu.

Suara Sarawak