KUCHING: Penatai pengusung pupu bansa enggau jalai pengarap lebuh pengerami ngelalu pengabang serimbai Taun Baru China (TBC) 2024 Sarawak nunjukka ulah bebasaka pangan diri entara rayat ba nengeri tu.
Ku Menteri Penyerakup Bansa, Datuk Aaron Ago Dagang, taja nengeri tu diuan pupu bansa tang semangat nya ukai semina ulih dipeda maya TBC tang mega ngaul pengerami bukai baka Hari Raya, Pengerami Gawai enggau ke bukai.
“Nya kebuah, kitai beterima kasih ngagai Perintah Sarawak laban ulih ngatur pengerami baka tu,” ku iya lebuh pengerami ngelalu pengabang ba Palan Konvensyen Borneo Kuching (BCCK), 10 Februari tu tadi.
Ku iya, enti sema program baka nya dibai ngagai menua pesisir, udah tentu deka diatur chara mit.
“Ari pengerichah TBC sekali tu, aku ngarapka pekara nya mega diasai maya ngintu pengerami bukai baka Hari Raya ila,” terang iya.
Nangkan nya, Menteri Industri Pemakai, Komoditi enggau Pemansang Wilayah, Datuk Seri Dr Stephen Rundi Utom madahka pengerichah pengerami ngelalu pengabang nya pekara ti manah ngambi Sarawak sesingkang maju.
“Kitai meda pupu bansa ngintu semua pengerami ke bisi di Sarawak enggau richah baka TBC, Hari Raya, Pengerami Gawai enggau ke bukai.
“Kitai deka terus nyadi chunto penyerakup lebuh kitai ulih bekunsi sebarang pengerami ti richah diintu begulai,” ku iya.
