SIBU: Kaunsil perintah lokal di Sarawak ngesan pangku pengawa besai nyadi rintai ba mua dalam atur pengawa nengeri tu.
Sapit Premier Sarawak, Datuk Amar Dr Sim Kui Hian madah, dikena nentu servis bekualiti ungkup rayat, kaunsil lokal mega napi penanggul pekara wang.
Iya nyemetak madah, tebal agi kaunsil lokal di Sarawak napi penanggul pekara wang ti betatak laban tikas rega reta tanah enda kala ditungkap berengkah ari 1960-an.
“Kitai agi ngena tikas meresa ari taun 1960-an ti enda kala ditungkap taja pen kos idup enggau gaji udah niki.
“Enti dibanding nengeri bukai baka Pulau Pinang enggau Selangor, sida udah nikika tikas meresa sida 25 peratus,” terang iya.
Dr Sim madah munyi nya nya rambau Program Apresiasyen Kaunsil Mengeri Sibu (MPS) ditu, malam kemari.
Iya madah, polisi ti dibantai niang Pehin Sri Adenan Satem nya ungkup ngelempung tating pekara wang rayat lalu ngujung ke tikas meresa enda ditiki.
Taja pen juluk nya dikena nentu kos idup ti majak niki enda nating rayat, ku iya, tang kaunsil lokal di Sarawak kelebih agi Sibu lenyau penatai pemisi sepenyampau RM2 juta berebak ari polisi nya.
“Tikas meresa ti baruh tu meri empas ngagai pekara wang kaunsil tang polisi tu agi dipejalai ke pemaik rayat.
“Kebendar, pengandal besai komuniti ngagai servis ti manah agi endang begunaka pemansut pekara wang ti chukup,” ku Menteri Pengerai Mensia Mayuh, Pengawa Berumah enggau Perintah Lokal nya nyemetak.
Berebak enggau nya, Dr Sim madah, Premier Sarawak, Datuk Patinggi Tan Sri Abang Johari Tun Openg begulai enggau bala kabinet nengeri udah besetuju meri pampas ngagai kaunsil lokal dikena mutar isu penyuntuk penatai pemisi nya berengkah ari taun baru.
Inisiatif nya, ku iya, dikena nentu servis ti manah agi ungkup rayat sereta enda nating sida nengah pengawa nikika bayar.
Taja pia, iya enda nerang silik pasal inisiatif nya.
Nangkan nya, iya meri tabi puji ngagai MPS berebak enggau komitmen sereta penyulut sida sepanjai taun 2024 taja pen napi penanggul pekara wang.
Iya ngarap MPS chakah agi nyendia servis pemadu manah ngagai peranak Sibu.
Bela datai, Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang Ming Tee, Kaban Kunsil Nengeri (ADUN) Bukit Assek, Chieng Jin Ek sereta Kaban Dewan Negara, Senator Robert Lau Hui Yew.
Sekretari Mendam Opis Menteri Pengerai Mensia Mayuh, Pengawa Berumah enggau Perintah Lokal, Datuk Elizabeth Loh sereta Chairman MPS, Kaunsilor Clarence Ting Ing Horh mega bisi datai.
