SYLVESTER RIANG
Suarasarawak.news@gmail.com
SIMANGGANG: Kent Boxing Club (KBC) mujur mandangka penyulut ti ngemantupka ati ba Pekit Tinju Tebuka Sarawak Renggat Keempat 2025 ti diatur di Stadium Mit Sri Aman kena 19 nyentuk 23 Ogos tu tadi.
Pekara nya diaku Tuai Jurulatih enggau Menijar KBC, Kennedy Edwin ti madah ke nya mih keterubah KBC bulih midul emas ba pekit nya.
Iya madah, ba pekit nya, tim KBC mujur bulih siti midul emas, dua midul pirak enggau empat midul engkeraju.
“Taja pen semina bulih siti midul emas tang tu siti penyulut ti besai bendar reti ba kami.
“Tu mandangka kami ulih besemekih enggau kelab tinju ti besai agi laban kami semina kelab tinju ti mit aja.
“Penyulut tu ngelaika kami deka nurai penyulut ti besai agi dudi hari,” ku iya.
Tampung iya, ba pekit nya, raban KBC udah nganjung bala atlit tinju sida ti pemadu manah ungkup ngulihka peneleba ba pekit ti amat.
Kennedy madah, peneleba nya besai reti ba atlit sida ngambi sida ulih nampung penyulut ba pekit tinju ti deka diatur dudi hari.
Nangkan nya, KBC, Luke Casmir Tugang madah, KBC udah nganjung bala atlit tinju pemadu manah enggau bisi pengulih sida.
“Ba pekit tu, kami nganjung tujuh atlit kami nyengkaum lima atlit ungkup Kategori Junior Lelaki, siku atlit indu ungkup Kategori Sukma Age enggau siku atlit lelaki ungkup Kategori Sukma Age.
“Kami chukup tepantup ati bulih siti midul emas laban bisi tikas penyulut tim kami bisi nambah ari ti udah,” ku iya.
