KUCHING: Kelab Lumba Motor 4X4 Peneresa Rampa Menua (PRM) mujur mandang penyiru sida ngagai komuniti nengah pengawa ngatur Kimpin Meri Darah 1.0 di Star Mega Mall, Sibu empai lama.
Program ti dipejalai nengah kerejasama Tabung Darah Sepital Sibu nya mujur ngumpul 70 kantung darah ngelui ari selinting tumu sida.
Sekretari Kelab PRM, Brian Asul Jantie ba sebengkah penerang madah, kimpin nya endang aktiviti ninting taun kelab nya.
Iya madah, pengawa ngatur kimpin nya nyadi tanggungpengawa sosial sida dikena mantu nambah bekal darah di sepital nya.
“Kelimpah nambah bekal darah, kami deka meri pengeleda ngagai mensia mayuh pasal pemaik ari pengawa meri darah ngagai pengerai enggau runding sida.
“Tu mega ulih narak semangat siru ke pangan diri kelebih agi sida ti begunaka bekal darah,” ku iya.
Nangkan nya, Presiden PRM, Presley Peter meri terima kasih ngagai semua raban ti bela ngemujur program nya.
Iya madah, pengawa meri darah nya beguna amat laban setitik darah nya ulih mantu nyelamatka nyawa.
“Aku ngarap kimpin tu ulih ditampung ngambi bekal darah di Sepital Sibu semampai chukup.
“Pia mega, aku chukup beterima kasih laban program tu lanchar,” ku iya.
