Kelas Ajat Indu Asadia mujur

KUCHING: Kelas Ajat Indu Asadia rengat ke-12 nerima timbal manah ari mensia mayuh.

Ketuai Asadia Mabong Unggang madah, kelas ajat indu sekali tu nerima 18 iku penyereta nyengkaum nembiak ari palan pelajar tinggi.

“Tebal agi sida tu udah abis belajar enggau benung belajar ba palan pelajar tinggi.

“Bala apai indai mega enda tinggal beranjungka bala anak sida belajar ngajat.

“Nya kebuah aku ngarap mayuh agi bala bukai beteladanka semengat angkunka main asal kitai bansa Iban,” ku iya madah ba sebengkah penerang berita ditu, kemari.

Nangkan nya ku iya, kelas ajat ukai semina nerima timbal ari mensia mayuh ba pelilih Kuching aja tang mega menua bukai.

“Bisi sekeda sida tu datai ari menua jauh ari Serian baka Kampung Lebor.

“Tu nunjukka pengangkun sereta pengagit sida belajarka main asal bansa kitai chukup tinggi,” ku iya.

Nya kebuah ku Mabong besai amat pengandal iya genap menua ulih bejalaika insiatif ngatur kelas belajarka main asal ngambi sida ti angkunka main asal ulih belajar enggau lantang.

“Enda semua kitai ulih ngelimpangka awak diri mindah jauh ketegal pengeran deka belajarka main asal.

“Enti sema bisi palan besemak, mayuh agi orang deka besaup enggau kitai ngetanka main asal nentuka iya enda lenyau jemah,” tandu iya.

Kelas bukai disedia Asadia dikena ngetanka main asal Dayak baka kelas Ajat Lelaki, Kelas Sape enggau Belikan, Gendang Pampat, Kuntau, Ngaga Kain Buriek enggau macham main asal bukai.

Berindik ari nya Mabong ngarapka semua kelas main asal tu nerima timbal manah kelebih agi ari raban bansa Dayak.

Mensia mayuh tau betelefon ngagai Mabong Unggang empu ba lumbur 012-6925562 enti deka nemu penerang silik pasal atur, rejista enggau ripih sereta rintai kelas main asal di akademi nya.

KELAS AJAT INDU… Mabong (tengah) begulai enggau bala nembiak kelas Ajat Indu Asadia.

Suara Sarawak