Kelas Betabuh ASADIA mujur ngerembai ngagai Batu Gong

KUCHING : Tau dikumbai timpang nyema kitai ngajat nadai digembar enggau munyi Tabuh.
Berindik ari nya, siti ari kebuah ngambika ajat tu lebih manah dipeda sereta richah didinga nyadi Akademi Serakup Dayak Iban Sarawak (ASADIA) naka ulih ngiri penemu ngagai nembiak rebak baru awakka mayuh agi orang landik betabuh.

Tabuh iya nya muzik ti diasilka ari perengka muzik baka gendang, tawak, bebendai enggau engkerumong.
Ketuai ASADIA Mabong Unggang madah, sida udah mujur ngerembaika kelas Betabuh ngagai Batu Gong, Siburan.

“Rebak baru ke dilatih ba palan tu diajar tiga bengkah tabuh iya nya bepun ari tabuh ajat ke mungkur tabuh ajat indu enggau lelaki, tabuh ngambi indu sereta tabuh kuntau.

“Pengawa ngepunka kelas Betabuh di Batu Gong berengkah kenyau 4 March tu tadi asil kerejasama enggau Komiti Pemansang enggau Pengelikun Genturung Pendiau (JKKK) Batu Gong.

“Kami meri terima kasih ngagai Penghulu Moari Jugan laban udah nesau raban nembiak redak ke dijaga iya ngambi ngulu kelas Betabuh tu,” ku iya.

Mabong ngarapka kelas Betabuh terus mujur sereta sida ke udah belajar ba kelas tu ulih dikangau maya bisi ngatur sesebengkah pengerami ba dedini endur.

Kelas Betabuh di Batu Gong betuaika Pengajar John Nuga.
Tabuh ukai semina ulih ditebah ungkup ngajat tang mega maya pengerami melah pinang, baka tabuh ngambi indu enggau ke bukai.

Berebak enggau nya, Mabong meri terima kasih ngagai Menteri Muda Perengka Pengangkut ke mega Kaban Kunsil Nengeri (ADUN) Mambong Datuk Dr Jerip Susil laban udah ngagihka belanja dikena ngemujurka kelas main asal di Batu Gong.

BETABUH DULU …Raban ASADIA benung betabuh ba sebengkah pengerami melah pinang ke diatur ba sebuah hotel di Kuching.

 

NGETAN MAIN ASAL…Mabong (duduk tengah) enggau John begambar kenang enggau sida ke nyereta kelas Betabuh diatur ASADIA.

 

NGIRI PENEMU…Pengajar John Nuga benung nerangka chara betabuh ti betul.