Kelas Sastera – Sains: S’wak nyukung sebarang pemutus

SERIAN: Perintah Sarawak apin nerima jaku gerah pasal nembiak Pom Empat taun baru nadai dipilih ngambi Kelas Sastera enggau Sains.

Menteri Pelajar, Sains enggau Pansik Teknologi, Datuk Seri Micheal Manyin Jawong madahka Perintah Sarawak patut bejalaika atur tu laban sistem pelajar di baruh kuasa Perintah Besai.

“Pangku pengawa kami nentuka polisi Perintah Besai dalam sistem pelajar dipejalai enggau lanchar sereta nitihka atur.

“Taja pia, aku beratika polisi tu ari sukut positif enggau negatif mega,” ku Manyin.

Iya mansutka jaku nya ngagai Suara Sarawak pengudah bejadika Pengawa Nyuaka Insentif Nembiak enggau Sekula Nyulut Ke-23 ba Dewan Komuniti, Serian ditu tadi.