LAGU Pengerindu Putus Di Tengah Jalai disadaka Kelemayang Band mujur dipansutka ba Channel YouTube Twin Tone Production (TTP) kena 11 March tu tadi.

Pengudah sebulan pansut ba YouTube, lagu pemadu baru ari raban nya mujur dipeda lebih 12,000 orang enggau nerima kelai like lebih 500 ari mensia mayuh.

Pia mega, lagu ti ngembuan rentak ayun lundai nya mujur dipantis enggau dikemendar Radio Televisyen Malaysia (RTM) ngambi ulih ditebah ba churung radio Wai.FM Iban enggau Cat.FM Sarawak.

Ngelansa senentang lagu baru Pengerindu Putus Di Tengah Jalai, Dickson madah, lagu nya kebendar ditengkebang iya ba taun 2020.

“Maya tu menua kitai napi pengerekai penyakit Covid-19, aku nadai pengawa digaga ba rumah lalu nguji nengkebang lagu tu.

“Lagu tu lalu diberi seput baru lebuh mujur dikeluarka ba baruh perabung Serikat TTP.

Aku beterima kasih ngagai pemungkal TTP, Allen Nyuntai laban meri peluang ngagai lagu tu dikeluarka ba baruh perabung serikat rikoding iya nengah Channel YouTube Twin Tone Production,” ku iya.

KABAN KELEMAYANG BAND

Kelemayang Band ngembuan tujuh iku kaban betuai ke Dickson Bos ti mega nyadi penebah keyboard ngagai raban nya.

Lexander Wawan enggau Alice Francis mangku pengawa nyadi penanyi keterubah enggau kedua lalu Davis Jock enggau Timothy Padan nyadi pemain gita.

Pia mega, Johannes Jilan Joseph nyadi penebah bassist enggau Fredrick Kawie nyadi penabuh drum.

Dickson madah, tuju sida sebuat numbuhka raban band nya ketegal keran deka ngemansangka dunya pemerindang industri muzik Dayak.

Ku iya, Kelemayang Band ditumbuh ba taun 2020 lalu penatai kaban band nya datai ari jalai cherita ti bebida.

“Sebedau kami sebuat betemu suba, kami bela bisi band kediri tang ukai band rikoding artis ti ngaga album laban kami semina ‘band kampung’ aja munyi ku orang.

“Ketegal suah dikangau orang merindang baka ba sebelah bar, pub, bistro, pengerami melah pinang enggau ti bukai, dia deh sida enam tu diambi aku tama dalam band ti ditumbuhka aku tu.

“Maya tu suba, kami empai bisi nama Kelemayang Band tang semina sebuah tim aja.

Nya alai, Jack nempa nama Kelemayang ti mai reti ‘ayas’ ngagai tim kami tu,” ku iya.

Iya madah, orang ti keterubah tama dalam band tu iya nya Lexander, Fredrick enggau Johannes.

“Ari mit kami sigi udah bekaban.

Maya tu suba, kami bela ngaga band kediri empu dikena rindu ati aja.

“Taja umur kami sebuat tu bisi bebida mimit tang kaul kami sigi enda kala putus nyentuk diatu,” tusui iya.

BELA BEPENAU

Iya madah, Lexander ngembuan sada nyawa ti chukup manah serta ngembuan pengelandik ba pengawa belagu.

“Lexander ukai semina landik belagu tang landik mega nebah kereban muzik ti bukai.

“Iya mega suah dikangau orang merindang lebuh bisi rami baka pengerami melah pinang nyentuk kala rembus ba menua Brunei.

“Berebak ari nya, aku mai iya tama lalu nyadi penanyi ngagai band kami tu,” ku iya.

Pekara sebaka mega nyadi lebuh Dickson meda pengelandik Fredick nebah drum, ninga patah nyawa Alice ba TikTok maya belagu, meda Davis nebah gita enggau meda Johannes nebah bassit.

“Siku agi kaban baru Kelemayang Band ti baru diterima kami sebuat kena 19 March tu tadi iya nya Timothy.

Aku betemu enggau iya ba sebuah bistro ba Senadin, Miri.

“Aku berasai temegah sereta gaga ati meda pengelandik Timothy laban tu siti ‘bonus’ ngagai band kami ti landik nebah kereban muzik,” ku iya.

NUNDA SINGKANG APAI

Dickson madah, industri muzik Dayak ukai pekara baru ba iya laban iya siku anak penanyi Iban, Andy Bos ti kala ngeluarka album Minta Nuan Pulai Baru (2004) ba baruh perabung Anderson Ngalai Production (ANP).

“Lebuh umur 11 taun suba, aku udah belajar megai kereban muzik baka keyboard, gita, drum enggau ti bukai.

“Pengudah landik nebah kereban muzik tu, dia deh aku nguji penau diri ngarang enggau nengkebang lagu.

“Nyau pemuas bekempit ba pengawa tu, enda berasai aku pen labuh pengerindu ba dunya pemerindang.

“Nya alai, aku jampat belajar lalu nguasa penau ba pengawa tu baka ngatur muzik, nusun muzik enggau pengawa bukai.

“Lebuh ngasai udah chukup nyikap diri, aku pen nguji masuk ba dunya pemerindang lalu aku suah dikangau belagu maya pengerami baka pengerami melah pinang enggau ti bukai,” ku iya.

TIBAR PENEMU

Dikena ngujung ke randau diri, Dickson madah, Kelemayang Band enggau baruh ati meri terima kasih ngagai semua peninga enggau peminat ti seruran nyukung pengawa sida sebuat.

“Pia mega, sekali agi Kelemayang Band beterima kasih ngagai raban TTP laban mantu kami ngeluarka ba baruh perabung sida.

“Enda tinggal nuju Producer Denn Al Mixing & Mastering sereta Radiant Music (Miri) laban udah mantu kami ngerikod lagu lalu nembu ke projek tu.

Aku ngarap pejalai kami sebuat majak mujur sereta seruran merindang semua kita ngena lagu kami ti baru dudi ari.

“Enggau ati baruh, kami sebuat minta ampun enti bisi pengurang lalu kami andal industri pemerindang kitai Dayak terus maju nyingkang ke mua,” ku iya.