KUCHING: Projek betanam sayur ngena teknologi hidroponik ba sitak Kunsil Nengeri (DUN) Batang Ai deka dikemansang, ku Sapit Menteri Dagang Antarabansa enggau Pengawa Beranakka Puku Sarawak, Datuk Dr Malcolm Mussen Lamoh.
Malcolm ke mega Kaban Kunsil Nengeri (ADUN) Batang Ai nya madah, juluk nya dibantai berindik ari pengulih Sri Aman ti mansang diatu nyadi tibang betanam betupi.
Nya kebuah ku iya, nengah pengawa ngemansang utai tanam tu, nya nentuka pedagang betanam betupi nambah penatai pemisi kelimpah nupi ikan tilapia mirah Batang Ai.
“Ba penemuai sehari tu (kemari), kami belajar, ngerembai enggau ngemanah sistem hidropinik ba sitak aku (Batang Ai) nyadi alternatif ngagai pengawa betanam betupi.
“Nengah pengawa ngena hidroponik, pekebun ulih ngasilka sayur ba timpuh kurang ari dua bulan seraya nganti ikan sida ulih dijual.
“Tu meri peluang nambahka penatai pemisi tambah seraya ngambi ikan ditupi sida,” ku iya.
Malcolm mansutka jaku nya ba aum pemberita pengudah ngatur pejalai nemuai seraya gawa ngagai Emma Hydroponics Farm Weare di Jalai Batu Kawa, ditu tadi.
