ENGKILILI: Kem Gempuru Kristian Entara Sekula (ISCF) 2023 Renggat Sri Aman ti diatur berunggu ba Sekula Sekondari (SMK) Engkilili kena 27 nyentuk 29 Oktober tu tadi nerima timbal manah ari bala nembiak sekula enggau pengajar Kristian.
Bisi 178 penyereta ngambi bagi ba kem nya ti mungkur 81 nembiak lelaki, 97 nembiak indu, 17 pengajar pengiring enggau 13 komiti pengatur.
Sida nya nembiak Pom Satu nyentuk Pom Enam sereta pengajar ari SMK Engkilili, SMK Lingga, SMK Lubok Antu, SMK Melugu, SMK St Luke, SMK Sri Aman enggau SMK Simanggang.
Tiga pengelicha dikangau khas ungkup kem nya baka Pengelicha Malaysian Baptist Theological Seminary Penang, Dr Franklin Karong, Scripture Union Sarawak, Pastor Sudin Batok enggau Good News Fellowship Kuching, Pastor Tommy Liang.
Siku Komiti Pengatur Kem ISCF 2023 Renggat Sri Aman, Pengajar Gomez Apat madah, kem nya bepelasar ke rambai jaku ‘Aku tu meh Jalai, Pemendar enggau Pengidup, nadai siku orang ulih datai ngagai Apai enti enda nengah Aku’ ti diambi ari Injil John 14:6.
Iya madah, kem nya keterubah diatur ba SMK Engkilili sereta renggat kelima diatur ba Bagi Menua Sri Aman lalu taun baru deka diatur ba SMK Melugu.
“Kem tu nyadi pelasar manah dikena narak ulah rindu sereta bebasaka pangan diri enda ngira bansa, jaku, jalai pengarap enggau chura kulit ngagai raban nembiak.
“Pekara tu ulih nempa nembiak ti bisi disiplin, manah ulah, ngembuan pengandal ati ti besai ngagai diri empu sereta besemekih ngena chara ti nemban.
“Pengawa bejalaika kem tu endang seraris enggau juluk Opis Menteri Pelajar Malaysia (KPM) ti deka nempa modal mensia menyana ari sukut tubuh, emosyen, jalai pengarap enggau intelek (JERI).
“Tu mega setipak enggau juluk KPM deka nyapai kusung penyai ulah ba sekula,” terang iya.
Iya madah, juluk nya ulih dikeamat enti bala nembiak seruran diembing enggau ditarak ngena ajar ti manah ari jalai pengarap ti dipegai sida empu.
Ku iya nyemetak, enti penanggul disiplin nembiak ulih diputar, bala nembiak ti diau ba buding ulih meri perati penuh ngagai pelajar sida.
Entara aktiviti ti bisi diatur ba kem nya baka pengawa belajar enggau belematika Bup Kudus, puji enggau sembah, licha jalai pengarap, sesyen saut tanya, aktiviti main enggau ti bukai.
Kelimpah ari nya, bala nembiak bela diembing nentu jalai pengidup sida dudi hari ti betuai ke Tuhan sereta nabur pengasih ngagai orang bukai ngelingi sida.
Ba lansa sebaka, Tuai Komiti Pengatur Kem ISCF 2023 Renggat Sri Aman, Pengajar Danis Giang beterima kasih ngagai bala nembiak sekula enggau pengajar ti udah ngemujur kem nya.
Iya ngarap, pengudah ngulu kem nya, bala nembiak majak berubah nuju pemanah ulah dikena ngurang penanggul disiplin ba sekula sereta nyadi berekat ngagai orang bukai kelebih agi sida sebilik.
