Kemansangka tanah NCR nyadi produktif

BINTULU: Sapit Kepala Menteri Tan Sri Dr James Jemut Masing ningkah penemu sekeda piak ke nuduh perintah nguna Seksyen 6 Kanun Tanah Negeri dikena ngerampas Tanah Adat Bansa Asal (NCR).

Ngasaika tuduh nya nadai pugu, iya madah pengawa meri Seksyen 6 Kanun Tanah Negeri kebendar dikena nyukat kelingi tanah komunal sebedau surat pala tanah diberi ngena Seksyen 18 Kanun Tanah Negeri.

“Bisi orang nguji bekelikuhka pekara lalu nyebut perintah ngambi tanah rayat bejalaika pengawa nyukat kelingi tanah NCR dibaruh Seksyen 6, Kanun Tanah Negeri, ku iya rambau Pengerami Masai Rayat ba Rumah Engkabang Anggang, Batu 14 Jalai Bintulu-Miri, ensana.

Iya nyemetak madah, pengawa nyual tanah dibaruh Seksyen 6 semina nyadi nyema disetuju semua orang ke ngempu tanah enggau komunti lalu nya pekara ke mar.

“Nya alai, orang ke bisi tanah NCT sigi enda mudah lenyau tanah jemah ila, ku iya.

“Taja pia, dibaruh Seksyen 18 iya ulih nyadi laban orang ke ngempu tanah kediri ngembuan hak ngempu tanah dibaruh seksyen tu, ulih nyual tanah sida ngagai sebarang orang ke meli.

Hak ngempu tanah dibaruh Seksyen 18 sempama baka meri duit ngagai orang beempu tanah NCR, ku tandu iya.

Masing ke mega Menteri Infrastruktur enggau Pemansang Penyangkai Kapal Sarawak madah ari penemu iya kediri rindu agi tanah NCR disukat ngena Seksyen 6 sahaja.

Tu, ku iya dikena ngajar orang ngempu tanah ngembuan pengelandik ngemansang tanah nyadi produktif.

Berebak enggau nya tau ngasuh orang ke bisi tanah ngemansangka menua diri,” ku iya.

Bela bisi datai Menteri Muda Bekal Karan Menua Pesisir Datuk Liwan Lagang, Adun Samalaju Majang Renggi, Adun Murum Kennedy Chuk Pai Ugon, Kaban Parlimen Hulu Rajang ke mega Chairman Institut Pengelikun enggau Pengerai Pengereja Pengawa Nasional (NIOSH) Datuk Wilson Ugak Kubong, Senator Rita Sarimah Patrick Insol enggau Tuai Rumah Engkabang Anggang.

Suara Sarawak