PAKAN: Kembuan ulah ti seruran beterimakasih ngambi nyadi adat ti patut dititihka semua orang, kelebih agi ngagai bala pemesai enggau perintah.
Ku Penyanding Penemu Opis Premier Sarawak (Industri Pemakai, Komoditi enggau Pemansang Wilayah) Tan Sri William Mawan Ikom, adat nya patut diterenak ngambi nyadi siti kelai ti ulih ditampung.
“Adat beterimakasih tu endang adat ti patut diterenak ba diri kitai empu, kelebih agi laban perintah seruran mantu kitai lalu enda ninggalka rayat,” ku iya.
Mawan, ti nyadi Kaban Kunsil Nengeri (ADUN) Pakan, nyebut pekara nya ba Program Randau enggau Tuai Komuniti sereta Tuai Bansa (KMKK) Sitak Wak.
Ba program nya, Mawan minta KMKK di Pakan semampai bekunsika semua penerang ngambi pengawa perintah tau dikereja enggau manah agi.
Iya mega madah Pakan bisi pengulih besai nyadi sitak ti ulih matak temuai dagang.
“Pakan siti pelilih ti pemadu manah enggau orang bukai di Malaysia lalu tu tau ngemuntangka temuai dagang datai ngagai Pakan.
“Di Pakan bisi mayuh endur narit ati sereta besejarah ti patut dilawa semua baka Pendam Rentap, wung, pengawa niki munggu enggau ‘homestay’ lama,” ku iya.
