Kemi manis ulih diseliah

KAPIT: Lebih 50 iku datai ngulu Program Kemi Manis Kapit di Lighthouse Kapit berimbai enggau Gerija Methodist Kapit, apin lama ke udah.

Kelab Lighthouse Kapit enggau Kelab Lion Kapit udah bekerejasama ngatur program pulaika pemaik raban diselinting.

Bala penyereta program tebal agi datai ari pesakit kemi manis ti deka nemu penerang silik agi pasal penyakit nya.

Ketuai program, Dr Sia Tih Kong ari Kelab Lion ngarapka bala penyereta nerima penerang ti betul sereta ngasika ajar ni bagi pemakai enggau penyampau ti patut diempa sereta ditangkan ngemeran gaya idup bepengerai.

Pia mega ku Dr Sia, atur program tu siti ari chara ngaul mensia mayuh seraya ngajar sida nyaga pengerai enggau sedarka pemesai guna pengawa nyaga pemakai ti nentuka pengerai tubuh sida.

Kebuah pia ku iya, beguna amat sida nyeliahka diri ari ditepan penyakit baka tu ti ulih diseliah ari ulah nyaga pemakai enggau gaya idup ti regas lalu penyakit tu enda berampit.

Berebak enggau program tu mega bisi diatur pengawa beperesa tikas peninggi gula dalam tubuh, tikas peninggi darah, program randau ruai sereta ke bukai.

NYAGA PENGERAI… Bala penyereta benung beperesa pengerai rambau atur program ungkup mensia mayuh apin lama ke udah