Kemisi PKP tau meri untung enti dikena manah

SIBU: Timpuh kemisi sekumbang Atur Tagang Pejalai (PKP) tau ngenatai mayuh penguntung nyema nemu ngena awak nya enggau pengawa ke manah lebih agi ngaul diri sebilik.

Mandal Presiden Parti Keadilan Rakyat (PKR) Jugah Muyang madah, mayuh bengkah pengawa tau dikereja enggau diri sebilik maya diatu laban ke sama bela diau di rumah.

“Kitai ngena awak tu besemak agi enggau diri sebilik, ngaga pengawa begulai baka bekebun, ngadu rumah kelimpah ngembing anak belajar.

“Pia mega, baka di rumah panjai nadai salah alai kitai bekebun ngambi ulih ngurangka agi belanja ari ke bebeli,” pia ku iya madah, kemari.

Kaban Parlimen Lubok Antu tu mega madah, apai indai meseti mandangka ulah ti manah ngagai anaka sida nyengkaum landik bekenaka awak lepa ngereja pengawa ti menuku.

“Enti ngelama tu kitai kelalu kisuk enggau kereja tang diatu mih maya ke engkeman kitai ‘malas’ maya kitai suba jarang begulai enggau anak tauka diri sebilik.

“Ambika banding udah ngirup pagi bai anak kitai belajar lalu enti ulih nitihka jam maya sida besekula.

“Ngalihka lemai tau ngaga pengawa bukai baka ngajar nembiak betukang,” ku iya madah baru.

Jugah madahka nyangka bisi ‘pengelebih’ atur diatur ngelanjarka agi PKP ti meri awak ngagai apai indai begulai enggau diri sebilik.

Suara Sarawak