KUCHING: Opis Bomba enggau Penyah Penusah (JBPM) Sarawak udah nyikap diri tumu napi penusah bah nengah pengawa meku ke kemisi semua pegawai enggau kaban sida di 38 Balai Bomba enggau Penyah Penusah (BBP) selampur Sarawak.
Pemangku Direktor JBPM Sarawak, Tiong Ling Hii madah, atur meku ke kemisi nya diterit berebak ari pemutus tuai renggat atas kelimpah dikena nyikap raban bomba napi penusah ngenyit baka penusah bah.
“Ungkup Sarawak, kemisi raban bomba di 38 BPP udah dibeku nitih atur tuai renggat atas berengkah ari Hari Minggu (1 Disember) tu tadi.
“Nya alai, sebarang pegawai tauka kaban ti benung kemisi, kitai deka ngangau sida pulai gawa taja pen gaya penusah di Sarawak enda kelalu raya tang kitai enda tau enda bejaga.
“Ungkup 38 balai tu, kitai bisi 1,284 pegawai enggau kaban lalu enti nyengkaum bomba bantu, kitai bisi urung 1,480 kaban ti deka nyikap diri napi penusah ngenyit,” ku iya nyemetak.
Tiong mansutka jaku nya rambau dirandau pemberita bekaup penyikap JBPM Sarawak napi penusah bah di Hotel Imperial ditu, kemari.
Iya nyemetak madah, JBPM Sarawak bisi ngatur kimpin nyikap diri napi penusah bah berengkah ari bulan Oktober tu tadi.
Nambah ke nya, ku iya, enti ari sukut kereban pengangkut, kitai udah nyikap perengka nya berengkah ari bulan September tu tadi.
