Kena peluang hari besai ngusung pangan diri

SIMANGGANG: Ulah ngusung pangan diri kelebih agi musin ngintu hari besai baka Taun Baru China ulih ngempitka kaul pupu bansa menua tu.

Pemungkal begulai Dayak Bukit Kelingkang (DBK) Insol Harry madah, kenyau ari kelia, pengawa begusung tauka ngabang endang balat dikemeran.

“Tu mih awak kitai ulih berami begulai enggau sida ti ngintu hari besai seraya ngerapitka kaul bebakih.

“Bisi sekeda ari kitai semina ulih ngusung pangan maya kemisi hari besai baka tu laban kiruh bekuli tauka kereja jauh di mengeri.

“Peluang baka tu patut dikena manah begulai enggau bala bakih tauka kaban belayan ke bisi pulai kemisi ke menua,” ku iya lebuh dirandau Suara Sarawak.

Ku Insol, menua Sarawak chukup betuah laban diuan pupu bansa ti ulih diau bebaik sereta ngemeranka ulah bebasaka pengarap enggau daya idup orang bukai ti diau besemak enggau kitai.

Tambah mega ku iya, rebak nembiak patut diseridi enggau diperansang ngemeranka ulah baka tu pulaika pemaik enggau pengelantang semua.

“Aku ngarapka rebak baru mega ulih nunda ulah ke manah lalu nyadi chunto rebak dudi.

“Tu peluang kitai ngabas kaban belayan, ngusung bala bakih seraya nanyaka rita bala menyadi ke bisi betampil enggau raban bansa China,” ku Insol madah nyemetak.

Beserimbai enggau pengerami Taun Baru China taun tu, Insol nguluka sida sebuat ngabang ngagai bala menyadi bansa China ke diau besemak di Simanggang ditu.

Entara rumah bakih digusung sida sebuat betubuh lebih 30 iku iya nya Kueh Chin Sian ba Kampung STC ditu.

“Penatai bala kami disambut enggau chukup basa, ditebahka merechun ba mua pagar penama rumah sereta dinah macham bansa pemakai enggau ai irup.

“Enda tinggal mega buah limau mandarin ti nyadi kelai hari besai Taun Baru China. Sida ke bujang dara mega bisi diberi angpau,” lansa iya.

Suara Sarawak