MAYUH berita enggau penerang dibantaika mensia mayuh nengah media rama baka Facebook enggau Instagram kelai ngingatka Hari Indai.

Nengah radio RTM Iban ba WaiFM, bala peninga bela ngenataika pesan lelenggau mantaika penyayau ngagai bala indai ke udah ngadaka sida ba dunya tu.

Pesan nya mega kelai ngenang jasa enggau pemanah indai ti udah ngibun kitai nyentuk udah besai diatu.

Nya kebuah, dunya meri siti hari dalam bulan May endur ngintu Hari Indai dikena ngingatka jasa indai kitai.

Apai enggau indai nyeridi kitai neladanka utai ke patut dikereja enggau semampai ngajar kitai bebaik enggau orang bukai kelimpah nempa nyadi mensia ti menyana dudi hari.

Lebuh aku beumur 30-an suba, indai aku Jabai Narang midang tumu pagi 1 September 1988.

Sepital Sarikei ti telefon ngagai lumur Prinsipal Sekula Sekondari (SMK) Julau terus disambung ngagai Rumah Temuai Perintah Julau lemai 31 Ogos ke alai lebuh nya aku nyadi temuai ngulu Pengerami Hari Merdeka.

Kangau ari Sepital Sarikei nya madahka indai aku majak raya.

Pengudah nerima kangau nya, tiga tauka empat kerita dikena bala pengajar bukai nyempulang pejalai kami duai bini aku ngagai Sepital Sarikei.

Lebuh ditinggang penusah baka nya, aku semampai ngenang siku pengajar interim ti chukup ibuhka aku kelimpah suah nyulu aku.

Pengajar tu benama Edwin Galan Teruki ari Sri Aman tang udah nya iya ngemaduka diri nyadi pengajar lalu gawa nyadi Bomba. Udah nya Edwin dipadu nyadi Sapit Direktor Bomba ba Kuala Lumpur.

Indai aku madamka seput urung pukul 4.15 pagi maya umur manggai 72 taun.

Tang niang bisi madahka peminta kepenudi sebedau madamka seput, indai minta segerit, gula enggau pusu.

Pukul 6 pagi nya, aku berasai sinu ngiring bangkai niang indai ti dibalut ngena kain burak ngagai bilik bangkai, ngenang pemanah iya udah ngadaka aku ba dunya tu, 34 taun ke udah.

Aku ngasaika hari indai layu sulai nya mih hari pemadu sinu ba pengidup aku.

Empat hari sebedau indai madamka seput, berat indai semina 26 kg aja tang iya agi dapat lebuh ba wad sepital.

Mulaika pengingat, indai beumur 20 taun lebuh ngadaka menyadi tuai kami ke benama Dinggu dalam taun 1936.

Indai ngadaka lima anak lelaki tang dua iku udah nadai lebuh agi dalam kandung.

Anak pengkuan lelaki idup pengelama 40 hari aja ngujungka aku nyadi anak pengkuan ari tiga diri menyadi lelaki ti idup.

Nya alai, tiga iku menyadi aku ke udah nadai nya ngujungka kami semenyadi ti agi idup semina bisi tiga iku.

Nama utai ti kala diberi tauka dikereja indai enda ngelui ari pemanah iya ngadaka aku enggau kami semenyadi ba dunya tu.

Abi telih lebuh bekindu pengelama dua bulan pengudah ngadaka kami semenyadi nya tanda penyayau enggau pementas indai ngada enggau ngibun kami.

Abi telih nya meruan dikenang belama lebuh beranak ke kami semenyadi, udah ngetatka pemedis beranak.

Abi telih tu ngayanka penyiru enggau penyayau indai ngada, nyeridi kitai dataika udah besai enggau deka meda kitai ngembuan pengidup ti menyana dudi hari.

Telih indai nya ngasuh aku berasai nangi deka nanya sereta enda kala nyebut diri enggai lebuh indai bisi peminta.

Penyayau indai lebih ari semua utai dikemisi genap mensia ba dunya tu laban sida udah berambunka nyawa ngadaka kitai ba dunya tu.

Nya kebuah, aku suah nurut peminta indai lebuh bekenangka pemedis ngadaka aku suba.

Lebuh nyeridi anak, indai enggau apai bela bejalaika tanggungpengawa diri ngembing enggau nyeridi bala anak iya.

Apai suah nempa pemanah ulah kami semenyadi enggau ngajar kami bedisiplin ba pengidup enda ngira ba sekula, rumah tauka luar rumah.

Lebuh apai merening, kami semenyadi sigi ngasika semua ajar iya laban udah diseridi ari mit ngambi semampai ngasika jaku apai indai.

Indai enda kala kasar jaku lebuh ngajar kami semenyadi tang aku kala dilara indai lebuh nangkal getah ba kebun kami.

Indai ngelara aku laban ngiri ai dalam pelai getah ngambika ai getah nya mayuh agi ari menyadi aku benama Jon.

Maya nya, aku beumur 10 taun enggau Jon beumur 16 taun ketegal ai getah enda nyadi laban kelalu mayuh diiri ai.

Taja indai udah ninggalka kami sebilik lebih ari 30 taun ke udah, tang aku agi sinu ati lebuh bepansa tauka betemu enggau indai tuai ti sama umur enggau indai suba.

Indai, nuan deka dikenang aku belama laban jasa nuan berambunka nyawa ngadaka aku suba.

Nya kebuah, ba penemu aku, ninting hari nya Hari Indai.

Nya alai, ibun manah apai indai kita baka sida ti udah ngibun, nyeridi kita ari mit dataika udah besai diatu.

Pemanah apai indai enda ulih dibalas enggau duit ringgit tang ulih dibalas enggau penyayau sereta pengibuh kita ngibun sida enda udah tuai ila.

Selamat Hari Indai nuju semua Indai!