Kenang manis Lenggang nerima menantu semampai dikeingat

KUCHING: Adat melah pinang dikena ngerami seduai ti diterang jadi melaki bini nitihka sempekat enggau penemu apai indai ari sesepiak kelai basa kitai nerima penatai menantu.

Ku Chairman Kelab Rekreasyen Taman Pandan Jaya, PW (B) Lenggang Nuing, nibarka jaku tesau ngagai kaban belayan ngulu pengerami melah pinang anak lelaki tuai iya endang dikena iya bekunsika pengaga sida sebilik nerima orang baru.

Tambah mega ku Lenggang ke mega pinchin soldadu, pengerami baka nya ulih ngempitka kaul diri sebala datai ari jauh tauka semak sereta bala bakih bukai ti sama ngentapka pendiau di mengeri.

Taja pengerami besai sida sebilik nyauka manggai setaun, tang kenang manis nya agi diasai lalu semampai dikeingat, ku Lenggang.

Nikalka kenang diri ku iya lebuh dirandau Suara Sarawak, tuju pengerami dikena sida sebilik nerima penatai orang baru, menantu terubah iya.

NIKIKA PENGABANG… Penatai bala sepiak indu ari Kampung Sangai Empany, Serian, disambut ngena adat basa, ai basu kaki sebedau niki ke rumah.

“Nengah pengerami tu mega, kami ulih ngenegapka tanggam kaul enggau bala kaban belayan datai ari jauh enggau semak ditu nyengkaum bala bakih enggau bala bukai.

“Tambah mega awak tu dikena kami bekelala enggau bala isan, kaban belayan sida ti baru nampil kami sebilik kelimpah basa nerima menantu ti nyemilik kami,” ku iya ngelansa.

Pia mega ku Lenggang, pemujur pengerami nya datai ari sukung tegut sereta kerejasama bala kaban kelab enggau kaban belayan bukai, besaup ngereja pengawa nengah chara beripai.

Ambika chunto ku iya, sehari sebedau hari nyadi, bala kaban kelab enggau bakih ti diau besemak, kelebih agi sida lelaki bela gawa beripai nirika bangsal, ngaga panggau enggau ngerintaika bangku seraya sida ke indu mupuk mela pemakai enggau ngaduka pengawa bukai.

“Pangau enggau endur begambar dilagu naka pemanah asil jari sida ke indu nyengkaum bala nembiak ti sama ngangkut kereban enggau perengka ti diguna maya hari nyadi.

BETUSUT… PW (B) Lenggang nerang pasal batang tubuh, batang pengawa enggau pemai ari anak lelaki iya, Steward.

“Besaup, beduruk gawa endang gaya asal kitai ba rumah panjai ti dibai sereta dikemeranka kitai ke diau ba mengeri, baka kami ditu.

“Tu pengawa ti manah amat lalu tau nyadika lalau enggau teladan sida rebak baru,” ku Lenggang temegah meda kerejasama sida sebuat.

Iya mega madahka diri temegah laban nerima penatai temuai dipebasa Chairman Serakup Dayak Iban Sarawak (Sadia) Datuk Paduka Dr Anthony Nait Mani, bala ketuai raban bansa, tuai rumah sereta lebih 500 iku bala bukai.

Bala komiti pengerami ti udah dipadu gawa nadai belampung tulang gawa sereta enda nejuka pangan diri ngatur pengawa ti udah dilempai ba sida.

Sida ke indu ti ngintu pengawa ba dapur lalu bebagi tubuh ngelalu penatai bala pengabang datai ari pupu bansa.

BAMBU ISAN… Lenggang meransang manuk sabung sida betapat nyeradak ai tuak ari kebuk, uti bambu isan.

Baka nya mega sida ke lelaki bela kiruh ngatur pengawa ti patut nyengkaum meresa gaya kuta tauka pintu gerbang tegap bediri, gaya panggau, bangku enggau ke bukai.

Sida mega kiruh magi pengawa bala ti ngambat pengabang ngena ai basu kaki tauka ai tuak lalu dibai duduk seraya nganti bala bukai datai.

“Bala pengabang berengkah datai urung pukul 4 lemai ditiki ngena basa. Udah nya dientudika penatai bala kaban belayan ari indu diuluka apai indu, Joss Anak Nor, datai ari Kampung Sangai Empany, Serian.

“Penatai seduai, Steward enggau Polly, ti dirami malam nya diuluka bala indu dara ngena ngepan Iban ngelawa panggau, endur seduai diterang jadi melaki bini.

“Pengudah seduai terenah duduk atas panggau, bala indu berengkah ngajat, siti ari basa kitai bansa Iban ngelalu penatai semua. Udah nya dientudika ajat bungah ari pengari sepiak lelaki enggau indu,” ku Lenggang ngelansa silik gaya sida masa temuai.

BAKA PINANG DIBELAH DUA… Steward enggau Polly udah diterang jadi laki bini.

Nangkan nya, apai lelaki enggau apai indu diangkat ngambi bejakuka batang pengawa malam nya seraya nerangka gaya pendiau, batang pengawa enggau penerang batang tubuh anak seduai.

Udah nya, Datuk Paduka Anthony dipebasa bejakuka adat jadi laki bini nyengkaum adat nguai sereta nibarka jaku lalau ngambika ruang bilik ti didiri likun, chelap embap enggau teguh kaul sereta meruan.

Tembu berandauka adat ditampung pengawa merekat tinchin enggau ngerasukka tinchin, udah nya melah kek enggau nyapi kek antara seduai ti disabung jadi sereta seduai nyapi apai indai kededua piak.

“Dikena nyilih adat muka baku ti suah dikena kitai bambu isan ba rumah panjai, kami sebuat milih muka kebuk lalu diarika lima iku pengari ari kededua piak.

“Manuk sabung kami ti udah dikebat memanah bela sikar muka sengkabung kebuk lalu betapat nyeradakka ai tuak dalam kebuk nya.”

KENANG MANIS… Lenggang disempulang bini iya, bala isan, anak enggau menantu sereta pengapit begambar atas panggau sebedau pengawa nyirap kek.

“Chukup richah sereta rindu ati meda bungah bala sida ti muka sengkabung kebuk. Bela bendar amat napatka pangan diri nyeradak ai tuak,” ku Lenggang tepantup ati meda pengerapit kaul antara sida.

Enda tinggal mega pengawa begambar ungkup kenang begulai enggau diri sebilik, bala bakih bukai, lalu pengawa beperindang lagu karaoke enggau betanda.

“Endang udah adat kitai bansa, tuju pengawa tu kelimpah ari berami iya nya deka nerang ba mua bala mayuh pengawa seduai udah disabung jadi laban pengawa melah pinang tu endang pemadu manah ari semua.

“Aku beterima kasih ke semua sukung enggau tulung ari semua ti enda ulih dirintai ditu, ngemujurka pengawa kami sebilik. Lalu penatai bala mayuh ngemai reti chukup besai ngagai kami sebilik,” ku iya.

Ku iya, pandak utai ke udah lalu panjai jalai pengidup ke empai dititi laban ngasaika diri agi bisi dua anak dara enggau siku anak lelaki ke pengkuan baru lanjau diatu.

Nya alai iya ngarapka dudi hari, ulah beduruk enggau besaup ngatur pengawa tu meruan dikemeran ngambika pengawa berat tau nyadi lempung dikereja.

“Aku andal amat mega pemanah serakup enggau pemereti ati lebuh kitai begulai, nya kebuah anang sanggu bepadah, betesau enti sema bisi pengawa besai diatur, nadai ngira kaban belayan ari jauh tauka semak.

“Kitai endang patut betulung sereta besukungka pengawa pangan diri laban tu mih chara aki ini kitai menya, ngempung penemu ngambika semampai seati,” Lenggang nyimpul jaku diri.

Suara Sarawak