SIBU: Siku kerana ditu napi pengerugi RM23,734 pengudah ditipu sindiket nyali duit bula nengah tali arus.
Tuai Polis Pelilih Sibu, ACP Zulkipli Suhaili ba sebengkah penerang sehari tu madah, orang kena tipu nya siku indu peranak menua tu empu ti beumur urung 30-an udah ngaga ripot polis bekaul kes nya kemari.
“Unit Pansik Penyalah Komersial Indu Opis Polis Pelilih (IPD) Sibu udah nerima siti ripot ari tudah ti madahka diri ditipu sindiket nyali duit bula nengah tali arus nyentuk napi pengerugi rugi RM23,734,” ku iya.
Iya madah, kena 20 Februari tu tadi, tudah nerima pesan pandak ba aplikasyen WhatsApp ari orang ti ngaku diri ejen nyali duit ti madahka sida bisi nyendia servis nyali duit ungkup diri empu ari bank nengah tali arus.
Terang Zulkipli, tudah tetarit ati enggau servis nyali duit nya sereta setuju nyali duit sepenyampau RM20,000 enggau bayar ninting bulan sepenyampau RM600 pengelama lima taun.
Udah nya, ku iya, tudah dipinta meri dokumen pengelala diri dikena ngerejister peminta nyali duit nya.
“Berengkah ari 21 nyentuk 22 Februari tu tadi, tudah udah ngaga tiga pengawa mindahka duit ngagai dua akaun bank baka ti dipinta saspek ungkup mayar jali nya.
“Pengudah mindahka duit nya, tudah lalu nadai nerima sebarang duit jali ba akaun bank iya,” ku Zulkipli.
Berebak enggau nya, ku iya, tudah balat irau ati lalu sedarka diri empu udah kena tipu sereta ngaga ripot polis.
Iya nyemetak madah, siti keretas pansik udah dibuka ba baruh Seksyen 420 Kanun Keseksaan ketegal penyalah nipu.
