SARATOK: Kaban Kunsil Nengeri (ADUN) Kalaka, Mohamad Duri ngansak rentayan kerejasama tegap agi entara Gerempung Nagang Dadah Malaysia (PEMADAM), ejensi perintah sereta komuniti menua dikena munas salah guna dadah ba bala nembiak.
Ku iya, penanggul salah guna dadah majak ngirau ke ati lalu begunaka chara semitan nengah kerejasama semua nentuka raban nembiak enda majak tepejuh ngereja penyalah nya.
“PEMADAM enda ulih ngereja pengawa kediri. “Kitai begunaka kerejasama rat entara ejensi perintah, institusyen pelajar, gerempung ukai dikuasa perintah (NGO), tuai komuniti enggau komuniti menua dikena negap pengawa nagang sereta nyuman,” ku iya.
Mohamad madah munyi nya lebuh ngulu randau ngatur Program Say No, Take Action and Rise (STAR): Intervensyen Interaktif Bekaul Salah Guna Dadah, ditu kemari. Ku iya, statistik ti dikeluar Ejensi Benchi Dadah Nasional (AADK) nunjukka trend kes salah guna enggau gian dadah nambah ti meseti diperati semua.
“Bepelasarka data AADK nyentuk September 2024, bisi 169,691 iku gian dadah dirikod ba selampur menua dibanding 145,526 iku ba taun 2023, ti nambah 16.6 peratus.
“Lebih ngirau ke ati, raban nembiak beumur entara 19 nyentuk 39 taun nya raban pemadu besai ti makai dadah iya nya 98,977 iku tauka 58.3 peratus ari semua kes ti dirikod,” ku iya.
Iya mega madah, trend nya nunjukka rebak biak entara raban pemadu mayuh kena panjuk pekara negatif nyengkaum makai dadah.
“Nyema penanggul tu enda ditagang, tu ukai semina ngeruga pengidup nembiak tang mega meri empas ngagai pemansang sosial enggau ekonomi nengeri,” ku iya nyemetak.
Mohamad nyemetak madah, sekula, palan pelajar tinggi sereta organisasyen nembiak meseti nyadi bakih strategik semampai ngenatai pesan benchi dadah.
Nambah ke nya, iya ngarap PEMADAM ulih ngerembai rentayan kerejasama enggau mayuh agi raban nyengkaum Komiti Pemansang enggau Pengelikun Genturung Pendiau (JKKK), gerempung nembiak sereta raban volunteer ngambi ngatur program nagang ba renggat baruh.
Iya madah baru, pemujur munas dadah ukai semina bepanggai ba pengawa neritka atur undang-undang aja, tang mega begunaka kerejasama begulai semua komuniti dikena nyendia endur ti manah, likun enggau nadai dadah.
STAR diatur PEMADAM Sarawak nengah kerejasama Opis Pelilih Saratok deka meri perati ngagai pengawa nambah pengeleda bekaul empas dadah ngagai bala nembiak enggau mensia mayuh nipak agenda perintah enggau Juluk Pemansang Meruan (SDG) Ketiga: Pengerai enggau Pengelantang.
