KUCHING: Kerejasama enggau raban bekaul kelebih agi pengemeran hotel enggau penyedia servis dagang temuai patut dipejalaika dikena ngelakuka program nikika tambai menua, Ibu Pertiwi.
Sapit Premier Sarawak, Datuk Amar Awang Tengah Ali Hasan madah, program nya ukai semina deka nyungkak semangat patriotik tang mega ulih ngemegah Sarawak.
“Penyelai pupu raban bansa di nengeri tu ulih matak temuai datai baka pengawa mandangka ajat asal ari bansa di Utara Sarawak baka Kedayan, Bisaya, Tagal, enggau Lun Bawang.
“Nya alai, aku deka meda program tu diatur nengah kerejasama enggau raban bekaul baka sektor hotel, awakka bala temuai ti kitu nemu pasal program nya,” ku iya.
Awang Tengah bejaku munyi nya rambau aum pemberita pengudah tembu Program Nikika Tambai Ibu Pertiwi Bulan November ba Padang Ibu Pertiwi ditu, tadi.
Ku iya, taga program nya mega patut ditetap ngambika temuai rindu meda pengawa tu baka ti digaga ba Istana Buckingham di London.
