LIMBANG: Transformasyen institusyen Komiti Pemansang enggau Pengelikun Genturung Pendiau (JKKK) sereta Tuai Raban Bansa enggau Tuai Komuniti (KMKK) nyadi entara pekara dikemerat nentuka agenda pemansang menua pesisir ulih dipejalai nemban, inklusif agi enggau nipak peminta komuniti kemaya hari.
Kaban Kunsil Nengeri (ADUN) Batu Danau, Datuk Paulus Palu Gumbang madah, pangku pengawa JKKK enggau KMKK diatu majak beguna nyadi penyungkak pemansang komuniti sereta jematan entara perintah enggau rayat ba renggat baruh.
Ku iya, landskap pemansang ti majak kompleks begunaka tuai komuniti ti dinamik, bisi integriti enggau besai juluk nentuka bemacham polisi sereta inisiatif perintah ulih nyadi pemaik nyata ngagai rayat.
“Enti suba pangku pengawa tuai komuniti meri perati ngagai atur adat enggau pekara komuniti, diatu atur JKKK meseti ditegap.
“Tuai ti sikar, bisi integriti enggau bisi juluk beguna amat nentuka pemansang sereta sosioekonomi ulih diasai ke komuniti,” ku iya.
Paulus madah munyi nya lebuh bejadi Program Negap enggau Ngatur JKKK Rumah Panjai serimbai Pengerami Medamit 2026 di Balai Komuniti Medamit, empai lama.
Ku iya, penau JKKK enggau KMKK ngenatai penerang, nerang ke polisi perintah sereta ngelala peminta rayat deka nentuka penemban bejalaika mayuh program pemansang ba renggat komuniti.
Berebak enggau nya, iya nyemetak madah ke kaul rat entara tuai renggat baruh, agensi perintah enggau mensia mayuh meseti terus ditegap nentuka nadai rayat dikelaung ari ngasai ke pemaik bemacham inisiatif enggau bantu ti disediaka perintah.
Nambah ke nya, Paulus madah ke program negap nya nyadi pelasar beguna nambah penemu, pengelandik enggau penau bala kaban JKKK ngambi sedia agi napi pemar pemansang kemaya hari.
Iya mega meri terima kasih ngagai Serakup Dayak Iban Sarawak (SADIA) Pampang Limbang laban udah ngatur program nya ti nyadi inisiatif strategik negap kapasiti tuai komuniti menua pesisir.
Ku iya, inisiatif negap institusyen JKKK enggau KMKK meseti ditampung laban kededua nya raban gawa ba luan ti mangku pengawa besai nentuka agenda pemansang perintah ulih dipejalai meruan enggau inklusif.
Program Negap enggau Ngatur JKKK Rumah Panjai nya entara isi program Pengerami Medamit 2026 ti diatur ari 19 nyentuk 21 June.
Program nya mega richah enggau pemandang agensi perintah, pedagang bejual produk sereta mayuh aktiviti main asal ti mandangka pupu bansa di Bagi Menua Limbang. – EDISI UKAS
