BINTANGOR: Kerejasama rat entara polis enggau tuai komuniti beguna amat dikena nagang penyalah kelimpah nyaga pengelikun peranak ba sitak sida empu.

ADUN Meradong, Datuk Ding Kuong Hiing madah, kaul polis enggau tuai renggat baruh patut ditegap dikena meri pemaik ngagai raban nyaga pengelikun bejalaika pangku pengawa sida.

Ku iya, kerejasama pintar nya ulih nempa gaya ti likun enggau negap pengandal komuniti ba sukut pengelikun.

“Nya alai, tuai komuniti patut negap pangku pengawa sida nengah bemacham program komuniti.

“Kerejasama manah tu ulih nempa semangat penyerakup entara komuniti enggau polis,” ku iya rambau aum entara tuai komuniti enggau Polis Pelilih Meradong ditu, kemari.

Program nya diatur dikena meri penyedar enggau nagang penyalah ba renggat komuniti kelimpah nyendia pelasar ngatur randau ba pengawa nagang penyalah, pengelikun, pengelantang, pekara undang-undang enggau pelajar.

Pia mega, program nya nyadi sebengkah pelasar begulai komprehensif ba renggat pemadu tinggi dikena nagang isu rama.

Kuong Hiing mantaika sukung ngagai pengawa numbuhka Skim Matau Volunteer (SRS) dikena mantu raban bekuasa nagang penyalah enggau mutar isu rama.

“Inisiatif manah tu ulih mantu nambahka pengelantang komuniti sereta nyamin pengelikun,” ku iya.