KUCHING: Sapit Kepala Menteri ke mega Menteri Pemansang Mengeri Enggau Pengeraja Asal Kedua Datuk Amar Awang Tengah Ali Hasan ngelanchaka bup ‘Glossary of Classification Timber and Timber Product of Sarawak’ karang ke-2 ba sebuah hotel tebilang di Kuching sehari tu.
Iya ti mangku Chairman Kaunsil Pengatur Pengawa Pusaka madah bup tu asil kerejasama Pusaka enggau Opis Kastam Diraja Malaysia.
“Bup tu ditengkebang nyadika malin penerang kekedua piak enggau industri kayu dikena ngelala produk kayu sereta ‘kod tarif’ balak.
“Bup tu mega ulih nyadika malin penemu pasal dagang domestik enggau entarabansa bepelasarka Perintah Kastam (Tagang Export enggau Import) 2017,” ku iya ke mega sereta Menteri Industri enggau Pemansang Pengawa Dagang.
Ku iya ba penerang berita kemari, bup tu ulih ngemuntangka pengereja pengawa Pusaka enggau Kastam ngadu peminta lisin export enggau import produk kayu enggau balak kelimpah ulih ngemuntangka pengawa dagang balak enggau produk kayu di menua tu.
Nangkan nya, Datuk Amar Awang Tengah Ali Hasan madah bup tu asil inisiatif piak Pusaka kena ngemanahka tikas servis pegereja pegawa sida ngagai penguna.
“Bup tu keterubah dikeluar di Sarawak lalu bisi mega dikeluarka karang ‘e-book’ ulih digiga nengah online iya nya website Pusaka www.sarawaktimber.gov.my,” ku iya.
