KAPIT: Kerejasama rat entara ejensi perintah enggau komuniti ba pengawa nyaga pemeresi sereta pengelikun sungai terus ditegap.

Pekara nya ulih dipeda nengah pengawa ngatur Program Narak Pengeleda, Pengelikun enggau Pemeresi Sungai ti diatur Kaunsil Sungai Sarawak (LSSS) Bagi Menua Kapit di Rumah Arik, Antawau Ili, Sungai Bena, ujung minggu tu tadi.

Kaban Kunsil Nengeri (ADUN) Pelagus, Wilson Nyabong Ijang madah, inisiatif baka nya ukai semina nambah tikas pengeleda mensia mayuh tang mega mekuh kerejasama entara ejensi perintah enggau komuniti dikena nyaga pemeruan sungai.

Iya madah, kerejasama rat komuniti ba program baka tu beguna bendar nentuka sungai semampai beresi, likun enggau dijaga ungkup rebak dudi.

Berebak enggau nya, iya meri terima kasih ngagai raban pengatur sereta komuniti ti udah bebendar ngemujur program nya.

“Perintah keran nampung agenda pemansang di menua ulu kelimpah meri perati ngagai peminta rayat.

“Tu nyengkaum peminta nukar atap ba Rumah Arik sereta nyukat tanah ngena Seksyen 6 Kanun Tanah Negeri ti agi nganti agih belanja,” ku iya.

Program pengelama dua hari nya diisi enggau mayuh aktiviti nyengkaum pengawa beripai meresi sungai enggau licha meri pengeleda dikenatai ejensi bekaul.

Ba program nya, iya mega nyua 15 jikit pengelikun pemeri LSSS ungkup peranak dikena nyamin sukut pengelikun ba sungai.

Bela datai, Pegawai Opis Pelilih Kapit, Thomas Geoffrey Kendawang, pengari LSSS, Leo Nanang, Injinir Opis Parit enggau Entali Ai (DID) Kapit, Inja Hellegers Achong, pengari Residen Bagi Menua Kapit, Daniel Batin Irbo, Dr. Nelson Berandah Seli ari Unit Pemansang Pengeraja Asal (URDA) Kapit sereta pengari Tuai Polis Pelilih Kapit, Insp. Muhamad Bazil Jaini. – EDISI UKAS