BINTULU: Bala raban ke gawa ba luan napi pengerekai igi penyakit Covid-19 enggau neritka Atur Nagang Pejalai di Bintulu nerima bantu peransang gawa ari Adun Samalaju Majang Renggi.
Ku Majang, pengawa dipangku sida nya kelebih agi betuai ke raban polis lalu disempulang raban Soldadu enggau bala Rela chukup besai reti ngagai rayat menua tu.
“Nadai chara bukai kena kitai meri peransang ngagai sida. Kitai ngarapka sida kering semengat lebuh gawaka pengelikun menua.
“Kelimpah ari sida ke nyaga pengelikun, kitai mega berterima kasih ngagai bala raban ari opis pengerai lalu ngarap ke sida gawa enggau liat ati lebuh ke napi pengerekai igi penyakit Covid-19 baka ke diatu,” ku iya.
Majang mansutka jaku nya ngagai pemberita lebuh nyuaka bantu iya ba Opis Polis Pelilih Bintulu ditu, kemari.
Berebak enggau nya, bantu ke diberi Majang baka utai empa enggau ai irup ke udah disua ngagai Ketuai Polis Pelilih Bintulu Superintenden Zulkipli Suhaili.
