Kes bunuh tukang jait: Agi bisi orang bukai deka ditan

KUCHING: Polis meragam agi bisi orang bukai disangka dalam kes munuh siku tukang jait ke alai bangkai iya dipajak dalam kantung besai ditemu ba tebing sungai di Kampung Pangkalan, Bau kena Hari Enam tu tadi.

Pekara tu ditukuka Ketuai Opis Pansik Penyalah (JSJ) Sarawak, Senior Asisten Komisioner Denis Leong Soon Kuai ti melaba udah tu bisi orang bukai deka ditan bekaul kes tu.

“Aku andal amat,” ku iya lebuh dirandau sentang pekara nya, tadi.

Naka diatu, dua orang disangka udah ditan, siku lelaki, 28 taun, enggau siku indu, 56 taun.

Pia mega ku Denis, buntas pansik bangkai niang mega udah dipejalai tang sida enda ulih mantaila asil buntas pansik nya.

Kenu ku Denis, kebuah pemati lelaki nya deka dibantai ba kort nyadika bukti enti kes tu dibai ngagai kort.

Kemari Denis madahka bangkai lelaki nya siku tukang jait mega siku pengempu kedai nyait pekayan ti tebilang ba mengeri tu.

Nambahka nya ku iya, sida udah tetemuka telefon binching lelaki nya dalam parit ba Lorong Chawan 12, ditu ngalihari tadi.

Kelimpah ari nya, bahan kes ditemu raban operasyen nyidi dipejalai Unit Forensik D10 enggau D9, Opis Pansik Penyalah begulai enggau raban penyelam ari Polis Marin.

Nitih ku penerang, telefon binching niang dibuai orang ke munuh iya.

Denis nambah, sida diatu benung ngempung mayuh agi bukti dikena mutarka kes bunuh tu.