KUCHING: Kes baru positif baru Covid-19 dirikodka nurun ngagai lima kes aja kemari dibandingka sebedau tu ti ngerikodka enam kes.
Penyampau nya ngujungka bisi 408 kes positif kenyau kes keterubah diripot kenaka 13 March 2020.
Nitihka penerang ari Komiti Penyangga Penusah Ngenyit Nengeri (JPBN), semua lima kes nya diatu benung diperubat di Sepital Besai Sarawak (SGH).
Kelimpah ari nya, bisi 99 kes baru Pesakit Agi Dipatau (PUI) diripotka kemari lalu 95 kes PUI agi nganti pemutus ari makmal.
Tujuh kes positif sebedau tu udah ditemu gerai lalu dikemendar pansut ari sepital ti ngujungka bisi 64 kes udah dikemendar pansut ari sepital.
Ari penyampau nya, lima kes di SGH lalu dua kes di Sepital Sibu.
Berebak enggau nya, piak polis udah ngetanka 83 iku orang ba nengeri tu ke ngelaban Atur Tagang Pejalai (PKP).
Ari penyampau nya, 22 kes di Kuching, Sibu (lapan), Miri (tujuh), enam di Kota Samarahan enggau Bau, lima di Padawan enggau Sarikei, empat di Lundu, Lubok Antu enggau Meradong, tiga di Saratok enggau Matu Daro, lalu siti kes diripotka di Limbang, Betong, Mukah, Serian, Sri Aman enggau Kanowit.
Kenyau PKP diteritka ba menua tu, bisi 1,049 udah ditan ba nengeri tu lalu 593 udah ditemu salah ba kort.
