BATANG Lupar ukai semina kedap ai ti anyut meraka Tanah Kenyalang tang siti arkib besai ti nyimpan sejarah pait di Malaysia.
Ba sungai ti keruh nya, bisi siku jagu besai benama Bujang Senang lalu ninga nama iya aja tau ngasuh sapa-sapa aja takut.
Pengelama bepuluh taun, penatai jelu ai nya balat ngirau ke ati bala orang berikan enggau peranak ti diau nebing sungai nya.
Taja pen penyampau ti amat sida ti ditagup jelu ai nya enda ulih dikenuku tang nama jelu nya nyadi buah mulut komuniti dia nyentuk digelar Raja Ai.
Diatu, kenyau ari taun 2021, sebarang orang ti nemuai ke Tebing Ai Sri Aman udah tentu deka meda siti patung jagu ti besai sereta reregah ba tebing sungai nya.
Taja pia, patung jagu ti ikonik suah alai temuai begambar nya suah dipetalatka mensia mayuh sekali ke patung nya amat patung Bujang Senang tauka bini iya, Dayang Fatimah Eneng Emas? Cherita pasal Bujang Senang berengkah dikemegau mensia mayuh kenyau ari taun 1941.
Pengelama bepuluh taun, jelu ai nya mujur diaku nyadi raja ai nyentuk siti kes tagup jagu nyadi kena 20 Mei 1992.
Orang ti kena tagup jagu ba Sungai Pelaban, Seduku nya siku indu Iban ti benama Dayang anak Bayang.
Penusah nya ngujungka operasyen ngasu jagu pemadu besai di Sarawak bisi dipejalai.
Dua hari udah nya, kena 22 Mei 1992, siti raban polis begulai enggau sida ti landik ngasu jagu bebansa Iban mujur munuh siku jagu ti chukup besai enggau pemanjai nyau deka 20 kaki (enam meter) pengudah belaban pengelama empat jam.
Siti sukut dokumentasyen operasyen nya madah ke jagu ti mujur ditimbak nya endang Bujang Senang.
Ba sepanjai belakang jagu nya bisi garis burak nipak ke penteba Bujang Senang ti suah diripot saksi mata kenyau bepuluh taun ti udah.
Pengudah jagu besai nya mujur dibunuh, dia siri kes tagup jagu nadai agi diripot nyadi.
Bukti pemujur munuh Bujang Senang nya ulih dipeda lebuh keruntuk pala jagu nya meruan dipandang ba Jong’s Crocodile Farm nyentuk sehari tu.
Ba belakang pengawa ngenuku chara saintifik, mayuh cherita ngaul dimensyen spiritual pasal jelu nya ba komuniti lokal.
Mayuh peranak lokal pechaya jelu ai ti kena bunuh nya ukai Bujang Senang tang Dayang Fatimah Eneng Emas. Ba sukut pengarap lama, Bujang Senang dipechaya kebal sereta enda ulih ditimbak ngena senapang.
Sida ti pechaya ke Bujang Senang agi idup madah ke jelu ai nya agi nguan Batang Lupar sereta terus merati ari dalam ai.
Pia mega, sida pechaya ‘Bujang Senang’ ditimbak raban bekuasa nya ukai Bujang Senang ti amat tang bini iya, Dayang Fatimah Eneng Emas ti sanggup nyerah diri dikena nyelamat raja ai nya.
Sekali ke patung jagu ba Tebing Ai Sri Aman nya ngari ke laki tauka bini jelu ai nya tang penatai jelu nya tetap ngidupka naratif pasal penyelai rampa menua Sarawak.
Ba bala pengusung ti bediri ba tebing Batang Lupar kelebih agi maya Benak mangka, patung jagu nya nyadi jematan visual ti ngempung penerang sejarah enggau pengarap lama pasal lagenda nya. – JAPEN
